Arne Slot
Arne Slot, stjóri Liverpool, segist ekki hafa miklar áhyggjur af þunnskipaðri vörn liðsins og að liðið sé vel mannað fyrir komandi leiktíð.
Liverpool seldi Jarell Quansah til Bayer Leverkusen í sumar og þá meiddist Joe Gomez í æfingaferð liðsins í Asíu.
Einu hreinræktuðu miðverðirnir í hópnum eru þeir Ibrahima Konate og Virgil van Dijk.
Ryan Gravenberch, sem spilaði sem varnarsinnaður miðjumaður á síðustu leiktíð, leysti af í miðverði gegn AC Milan í gær, en hann spilaði þessa stöðu í nokkrum leikjum á síðustu leiktíð.
Slot segir liðið vel mannað en viðurkennir þó að það hafi ekki enn fyllt í skarð Quansah.
„Miðvarðarstaðan veldur okkur ekki áhyggjum. Hvað með breiddina? Ég held að Ryan hafi sýnt að hann sé fær um að spila í þessari stöðu. Hann gerði það líka á síðasta tímabili þó við vitum öll að við viljum heldur nota hann í 'sexunni'. Wata [Endo] getur líka spilað þar og Joe Gomez, sem er aðeins að glíma við smávægileg meiðsli, var líka góður á síðasta tímabili. Við erum með nóg af möguleikum, en það er alveg rétt að Jarell Quansah fór og við höfum ekki enn fundið mann í hans stað,“ sagði Slot eftir leikinn.
Enski landsliðsmaðurinn Marc Guehi hefur verið orðaður við Liverpool í allt sumar og gæti vel farið svo að hann verði keyptur þegar nær dregur gluggalokum.
Athugasemdir
