Spáin fyrir enska: 17. sæti

Leeds er komið aftur upp í ensku úrvalsdeildina eftir frekar stutta dvöl í Championship-deildinni og það gleður þann stóra hóp Íslendinga sem styður við bakið á þessu sögufræga félagi. Leeds fór með sigur af hólmi í Championship-deildinni í fyrra og rauf þar 100 stiga múrinn sem er býsna vel gert. Þrátt fyrir þann árangur eru efasemdir um Daniel Farke, stjóra liðsins, þar sem hann hefur ekki náð góðum árangri er hann hefur verið í ensku úrvalsdeildinni. Hann hefur aðeins unnið sex af 49 leikjum sínum sem stjóri í deild þeirra bestu en hann stýrði áður liði Norwich. Hann er talinn líklegastur til að missa starf sitt fyrstur á þessu tímabili en Leeds hefur lýst yfir stuðningi við hann undanfarin misseri.

Sumarglugginn hefur verið áhugaverður hjá Leeds, sem hefur styrkt liðið með sjö nýjum leikmönnum. Það eru Jaka Bijol frá Udinese, Lucas Perri frá Lyon, Lukas Nmecha og Sebastiaan Bornauw frá Wolfsburg, Gabriel Gudmundsson frá Lille, Sean Longstaff frá Newcastle og Anton Stach frá Hoffenheim fyrir um 17 milljónir punda. Flestir þessara leikmanna hafa ekki reynslu úr ensku úrvalsdeildinni, sem veldur nokkrum áhyggjum, en fjárhagslegt svigrúm félagsins er talið nægt til að styrkja hópinn frekar ef á þarf að halda.

Að halda sætinu í deildinni er aðalmarkmið Leeds á þessu tímabili. Fyrsti leikur þeirra verður gegn Everton á Elland Road þann 18. ágúst, og verður mikilvægt að ná góðum úrslitum strax í byrjun til að byggja upp sjálfstraust og trú á verkefninu. Ef nýju leikmennirnir ná að stilla saman strengi fljótt gæti Leeds átt möguleika á miðjumoði í þessari sterku deild. Hins vegar gæti slök byrjun og varnaróöryggi leitt þá í fallbaráttu — og sett stöðu Farke í hættu mun fyrr en vonast er til. Leeds er stórt félag sem á að vera í deild þeirra bestu og núna hlýtur að vera kominn tími til að festa sig þar og búa til góða tíma.

Stjórinn: Daniel Farke tók við sem stjóri Leeds United sumarið 2023 og leiddi liðið aftur upp í ensku úrvalsdeildina með glæsilegum hætti á síðustu leiktíð, þar sem liðið náði í 100 stig. Hann er þekktur fyrir að vilja halda í boltann og vera yfirvegaður einstaklingur, sem hefur komið með stöðugleika og taktískan skýrleika í lið sem hafði glímt við ákveðinn óstöðugleika fyrir fall árið 2023. Þrátt fyrir að hafa átt í erfiðleikum í úrvalsdeildinni áður með Norwich City, hefur Farke hlotið mikið hrós fyrir að endurvekja trú og sjálfstraust á Elland Road og fyrir að gefa ungum leikmönnum eins og Archie Gray tækifæri. Nú snýr hann sér að því að sanna að hann geti ekki aðeins náð árangri í Championship heldur einnig með Leeds í ensku úrvalsdeildinni og byggt upp til lengri tíma. Hann er ekki dáður og dýrkaður eins og Marcelo Bielsa hjá stuðningsmönnum Leeds, en það gæti breyst ef liðið stendur sig vel á þessu tímabili og á næstu árum.



Daniel James, sá eldsnöggi kantmaður. Var magnaður á síðasta tímabili og var helsta vopnið í sóknarleik Leeds ásamt framherjanum Joel Piroe. Hann skoraði tólf mörk á síðasta tímabili og lagði upp níu í Championship-deildinni sem er frábærlega gert. Hann er með talsverða reynslu úr ensku úrvalsdeildinni og það eru fáir sem ráða við hraðann sem hann býr yfir.

Fylgist með: Willy Gnonto er leikmaður sem vakti athygli síðast þegar Leeds var í ensku úrvalsdeildinni en hann var valinn besti ungi leikmaður félagsins á síðustu leiktíð. Þessi 21 árs gamli ítalski framherji hefur fengið góða reynslu í Championship síðustu árin og mætir núna tilbúnari til leiks í ensku úrvalsdeildinni. Hann hefur nú þegar spilað 13 landsleiki fyrir Ítalíu og er alveg klárlega mikill framtíðarleikmaður sem mun vonandi fá stórt hlutverk í liði Leeds í vetur. Harry Gray er þá 16 ára gamall bróðir Archie Gray, sem spilar núna með Tottenham. Hann er gríðarlega efnilegur leikmaður sem gæti fengið mínútur með Leeds á komandi tímabili.

Besta og versta mögulega niðurstaða: Besta niðurstaðan er sú að Leeds forðist það að lenda í fallbaráttu og byggi grunn til að festa sig í sessi í ensku úrvalsdeildinni. Versta mögulega niðurstaðan er sú að allt fari í skrúfuna, Farke verði rekinn og það finnist ekki góð lausn sem endar með því að liðið kolfellur.

Þau sem spáðu: Anton Freyr Jónsson, Elíza Gígja Ómarsdóttir, Elvar Geir Magnússon, Guðmundur Aðalsteinn Ásgeirsson, Haraldur Örn Haraldsson, Ívan Guðjón Baldursson, Kári Snorrason, Mate Dalmay, Snæbjört Pálsdóttir, Stefán Marteinn Ólafsson, Sverrir Örn Einarsson, Sæbjörn Þór Þórbergsson Steinke og Sölvi Haraldsson.

Liðin fengu eitt stig og upp í 20 eftir það hvar hver og einn spáði þeim. Liðið í síðasta sæti fékk eitt stig, liðið í 19. sæti tvö stig og koll af kolli. Stigin í spánni tengjast á engan hátt stigafjölda liðanna í deildinni..

Spáin:
1. ?
2. ?
3. ?
4. ?
5. ?
6. ?
7. ?
8. ?
9. ?
10. ?
11. ?
12. ?
13. ?
14. ?
15. ?
16. ?
17. Leeds, 53 stig
18. Wolves, 50 stig
19. Sunderland, 33 stig
20. Burnley, 22 stig