Þór Andersen Willumsson er búinn að skrifa undir sinn fyrsta samning við Breiðablik og fetar þar með í fótspor eldri bræðra sinna.
Þór er yngsti bróðir Willums Þórs Willumssonar og Brynjólfs Andersen Willumssonar sem leika báðir sem atvinnumenn í efstu deild hollenska boltans og eiga landsleiki að baki fyrir Íslands hönd.
Þór er aðeins 16 ára gamall og er algjör lykilmaður í 2. flokki hjá Breiðabliki þar sem hann hefur verið að raða inn mörkunum að undanförnu. Í fyrra tók hann þátt í sínum fyrstu landsleikjum og er með eitt mark í þremur leikjum fyrir U16 landslið Íslands.
Faðir drengjanna er Willum Þór Þórsson, stjórnmálamaður og fyrrum þjálfari stórvelda KR og Vals.
