Juelsgaard, sem er 33 ára, kom til Vals frá AGF í Árósum fyrir síðustu leiktíð. Hann spilaði 24 leiki í Bestu deildinni og skoraði tvö mörk.

Juelsgaard, sem getur leikið bæði sem miðvörður og vinstri bakvörður, var með samning út næstu leiktíð en Valur var með riftunarákvæði og ákvað að nýta sér það. Hann sagði í samtali við Vísi að sér hefði verið brugðið. Hann hélt að hann væri á leið á fund til að ræða um flug til Danmerkur fyrir frí eftir tímabilið en svo var ekki. Samningi hans var rift.

Núna er Juelsgaard, sem á að baki tvo A-landsleiki fyrir Danmörku, að æfa með AGF en samkvæmt staðarmiðlinum þar - Århus Stiftstidende - þá mun hann ekki semja við félagið. Hann þekkir vel til hjá AGF og fékk að æfa þar til að halda sér í góðu standi.

Juelsgaard hefur talað um það að hann væri opinn fyrir því að spila áfram á Íslandi ef gott tækifæri býðst. Hann segist ekki loka neinum hurðum.

Íslenski landsliðsmaðurinn Mikael Neville Anderson er á meðal leikmanna AGF.