Crystal Palace tók á móti Manchester United í fyrsta leik dagsins í ensku úrvalsdeildinni.

Heimamenn voru sterkari aðilinn í fyrri hálfleik og fengu nokkur góð marktækifæri áður en Leny Yoro braut afar klaufalega af sér innan vítateigs. Jean-Philippe Mateta steig á punktinn og setti boltann í netið en þurfti að endurtaka spyrnuna eftir að boltinn snerti báða fætur hans í skotinu.

Þetta er vegna reglubreytingar frá því í sumar eftir að Julián Alvarez lenti í því að fá vítaspyrnumark dæmt af fyrir sömu sakir í 16-liða úrslitum Meistaradeildarinnar.

Mateta skoraði örugglega í bæði skiptin til að taka forystuna fyrir Palace.

Rauðu djöflarnir fengu færi til að jafna en tókst ekki svo staðan var 0-1 í hálfleik. Í síðari hálfleik sneri United stöðunni við með tveimur mörkum eftir aukaspyrnur frá Bruno Fernandes.

Fyrra markið skoraði Joshua Zirkzee með glæsilegu vinstrifótarskoti úr þröngu færi. Seinna markið gerði Mason Mount eftir að Fernandes rúllaði boltanum til hans úr aukaspyrnunni og er hægt að setja stórt spurningarmerki við Dean Henderson markvörð í báðum þessum mörkum.

Síðari hálfleikurinn var tíðindalítill. Man Utd leit betur út en hvorugu liði tókst að skapa hættuleg færi. Lokatölur urðu því 1-2 fyrir Rauðu djöflana eftir endurkomu á Selhurst Park.

Man Utd klifrar yfir Palace á stöðutöflunni með þessum sigri. Lærisveinar Ruben Amorim eiga 21 stig eftir 13 umferðir, einu stigi meira en Palace.

Það voru liðin fimm ár síðan Man Utd vann deildarleik á Selhurst Park.