Fótbolti.net

fim 01. maí 2008 08:00

Hafliði Breiðfjörð

Spá Fótbolta.net í Landsbankadeild karla - 10. sæti

Sérfræðingar Fótbolta.net spá því að Þróttur verði í 10. sæti Landsbankadeildarinnar í sumar og bjargi sér þar með frá falli. Sextán sérfræðingar spá í deildina fyrir okkur þetta árið en þeir raða liðunum upp í röð og það lið sem er í efsta sæti fær 12 stig, annað sæti 11 og svo koll af kolli niður í tólfta sæti sem gefur eitt stig. Þróttur fékk 49 stig út úr þessu.

Sérfræðingarnir sem spáðu eru:
Atli Eðvaldsson fyrrverandi landsliðsþjálfari, Benedikt Bóas Hinriksson blaðamaður á DV, Bjarni Jóhannsson þjálfari Stjörnunnar, Guðlaugur Baldursson þjálfari ÍR, Henry Birgir Gunnarsson blaðamaður á Fréttablaðinu, Hörður Magnússon íþróttafréttamaður á Stöð 2 Sport, Jesper Tollefsen þjálfari Víkings, Luka Kostic þjálfari U21 árs landsliðsins, Magni Fannberg þjálfari Fjarðabyggðar, Magnús Gylfason aðstoðarþjálfari U21 árs landsliðsins, Margrét Lára Viðarsdóttir Íþróttamaður ársins 2007, Ólafur Jóhannesson landsliðsþjálfari Íslands, Pétur Pétursson aðstoðarlandsliðsþjálfari, Valtýr Björn Valtýsson íþróttafréttamaður á RÚV, Víðir Sigurðsson blaðamaður á Morgunblaðinu, Þorlákur Árnason yfirþjálfari yngri flokka Stjörnunnar.

Hvað segir Guðlaugur?
Guðlaugur Baldursson er sérstakur álitsgjafi okkar um Landsbankadeild karla. Guðlaugur er þjálfari ÍR sem leikur í 2. deildinni og gerði liðið að Reykjavíkurmeisturum fyrr í vetur. Hann hefur áður þjálfað ÍBV í Landsbankadeildinni.

Hér að neðan má sjá álit Guðlaugs á Þrótti.

Um Þrótt:
Þróttarar hafa ekki misst marga leikmenn frá sér en hafa verið að bæta við sig töluvert af mönnum. Þeir eru búnir að fá til sín 8-9 leikmenn sem flestir gera tilkall til að vera í byrjunarliðinu. Það er eðlilegt þegar menn eru að koma upp úr deild að reyna að styrkja sig. Það er alltaf spurning hvernig gengur að púsla því svo saman. Mér finnst líklegt að þeir verði að berjast í neðri hluta deildarinnar.

Styrkleikar:
Þeirra helsti styrkur er stemmningin og umgjörðin í kringum liðið. Svo verður spurning hvernig menn eins og Sigmundur og fleiri öflugir leikmenn koma inn í þetta. Ef Hjörtur Hjartarson er í góðu standi þá á hann eftir að skila þeim nokkrum mörkum.

Veikleikar
Það eru töluverðar breytingar og nýir leikmenn að koma inn. Spurningin er hvort að liðið hefur næga breidd í leikmannahóp sínum til þess að standast álagið í efstu deild.

Gaman að fylgjast með
Það verður virkilega gaman að fylgjast með því hvort að strákar eins og Rafn Andri og Haukur Páll, nái að springa út í sumar. Þeir eru báðir gríðarlega efnilegir leikmenn.

Lykilmaður
Maðurinn með skemmtilega nafnið, Michael Jackson og Sigmundur Kristjánsson eru lykilmenn í Þróttarliðinu.

Þjálfarinn:

Gunnar Oddsson þjálfar lið Þróttar annað árið í röð en hann hafði tekið við liðinu fyrir síðustu leiktíð og kom þeim upp á sínu fyrsta ári er liðið endaði í öðru sæti 1. deildar. Það var þriðja árið í röð sem hann kom liði upp um deild því tvö árin á undan hafði hann komið Reyni Sandgerði úr 3. deild í þá fyrstu. Gunnar þjálfaði Keflavík frá 1997-1999 ásamt Sigurði Björgvinssyni og þá tók hann við liðinu 15.ágúst 2000 og stýrði því út tímabilið. Gunnar er einn af leikjahæstu mönnum Íslandsmótsins frá upphafi en hann lék á sínum tíma 305 leiki á Íslandsmótinu og spilaði hann lengst af með Keflavík eða 177 leiki.

Líklegt byrjunarlið Þróttar í upphafi móts:

Völlurinn:
Þróttur hefur ákveðið að leika heimaleiki sína á heimavelli sínum, Valbjarnarvelli en ekki á Laugardalsvelli eins og undanfarin ár er þeir eru í efstu deild. Til að það gæti gerst fengu þeir undanþágu fyrir keppnisleyfi frá KSÍ gegn því að koma upp lágmarks áhorfendaastöðu en fljótlega stefnir félagið að því að koma upp glæsilegum leikvangi þar sem nú er gervigrasvöllurinn í Laugardal.
.

Stuðningsmenn:
Meðal þekktra stuðningsmanna Þróttar eru: Jón Ólafsson tónlistarmaður, Tvíburarnir Gunnar og Ásmundur Helgasynir, Halldór Gylfason leikari og tónlistarmaður, Eyjólfur Kristjánsson poppari, Hlynur Áskelsson betur þekktur sem Ceres 4 úr hljómsveitinni Merzedes Club, Björk Vilhelmsdóttir borgarfulltrúi, Þorvaldur Davíð leikari og faðir hans Kristján Þorvaldsson fyrrverandi ritstjóri Séð og Heyrt.

Spáin
nr.	Lið	Stig
1	-	-
2	-	-
3	-	-
4	-	-
5	-	-
6	-	-
7	-	-
8	-	-
9	-	-
10	Þróttur	49
11	Fjölnir	48
12	Grindavík	24

Um félagið

Knattspyrnufélagið Þróttur
Stofnað 1949

Titlar:
Reykjavíkurmeistarar 1966 og 2002

Búningar:
Uhlsport

Aðalbúningur:
Röndótt rauð/hvít treyja, hvítar buxur, hvítir sokkar

Varabúningur:
Svört treyja, svartar buxur, svartir sokkar

Opinber vefsíða:
Trottur.is

Komnir og farnir

Nýjir frá síðasta sumri:

Sigmundur Kristjánsson frá KR
Dennis Danry frá Herfolge
Kristján Ómar Björnsson frá Haukum
Jens Elvar Sævarsson úr Fylki
Bjarki Freyr Guðmundsson frá Keflavík
Carlos Alexandre Bernal frá Jcaty SC
Ismael Da Silva Fransisco frá SC Covilhã
Bjarni Óskar Þorsteinsson frá Gróttu
Viktor Unnar Illugason frá Reading á láni