Valur hafnaði í fyrra í sjötta sæti Pepsi Max-deild karla eftir að hafa unnið Íslandsmeistaratitilinn tímabilin tvö þar á undan. Árangurinn var mikil vonbrigði fyrir liðið sem ætlaði sér auðvitað að vinna þriðja titilinn í röð.

„Niðurstaðan var gríðarleg vonbrigði sem mega ekki endurtaka sig og félagið verið að draga lærdóm af," segir í ársreikningi Vals um síðasta sumar.

„Eftirtaldir leikmenn gengu til liðs við félagið: Emil Sigvald Lyng, Lasse Petry, Gary Martin, Kaj Leo í Bartalstovu, Garðar Bergmann Gunnlaugsson, Hannes Halldórsson og Parick Pedersen snéri aftur um mitt sumar. Allt eru þetta frábærir knattspyrnumenn sem miklar vonir voru bundnar við en meiðsli og óvæntar 'óvelkomnar' uppákomur urðu þess valdandi að einhverjir af okkar leikmönnum náðu ekki að blómstra þetta sumarið og árangurinn varð eftir því."

Eftir sumarið lét Valur þjálfarana Ólaf Jóhannesson og Sigurbjörn Hreiðarsson fara. Í þeirra stað voru Heimir Guðjónsson og Srdjan Tufegdzic ráðnir til starfa.

Vísir tók saman umfjöllun yfir ársreikninga félaga í Pepsi Max-deildinni sem hægt er að skoða hérna.