FH-ingar endurheimtu annað sætið í Bestu deild kvenna með því að vinna Stjörnuna, 4-3, á Samsung-vellinum í Garðabæ í kvöld.

Þróttarar höfðu tekið annað sætið af FH-ingum eftir frækinn sigur á toppliði Breiðabliks í gær en FH var staðráðið í að taka sætið aftur af þeim og setja aukna pressu á Blika.

Stjarnan komst yfir á 2. mínútu leiksins eftir slæm mistök Macy Enneking sem missti skot Birnu Jóhannsdóttur frá sér og til Úlfu Dís sem skoraði örugglega úr frákastinu.

FH-ingar svöruðu með mörkum frá Thelmu Lóu Hermannsdóttur og Thelmu Kareni Pálmadóttur. Thelma Lóa komst í gegnum vörn Stjörnunnar og jafnaði metin áður en Thelma Karen eftir laglegan sprett á kantinum. Hún tók skot sem Bridgette Skiba varði, en boltinn datt aftur út á Thelmu sem var ekki að fara klikka í annarri tilraun.

Stjarnan fékk fullkomið tækifæri til þess að jafna metin eftir hálftímaleik er Thelma Lóa braut á Betsy Hassett í teignum. Gyða Kristín Gunnarsdóttir fór á punktinn en Enneking giskaði á rétt horn og varði vel.

Enneking varði síðan aftur frábærlega aðeins þremur mínútum síðar er Snædís María Jörundsdóttir komst ein á móti markverðinum, en Enneking vandanum vaxin. Skiba var ekki síðri á hinum enda vallarins og bauð upp á stórkostlega markvörslu sem má alveg tilnefna sem eina af bestu vörslum tímabilsins.

Enneking kom hins vegar engum vörnum við undir lok hálfleiksins er Ingibjörg Lúcía Ragnarsdóttir átti tilraun sem hafnaði í stönginni og út á Birnu sem jafnaði metin með skalla.

Staðan í hálfleik 2-2 í fjörugum leik en það voru FH-ingar sem kláruðu dæmið í þeim síðari.

Thelma Karen kom FH aftur í forystu á 52. mínútu er hún las slaka sendingu á Hassett. Thelma komst inn í sendinguna áður en hún skoraði annað mark sitt í leiknum.

Berglind Freyja Hlynsdóttir skoraði fjórða mark FH á 81. mínútu eftir að Katla María Þórðardóttir vann boltann. Berglind hljóp síðan með boltann fram völlinn, alla leið að marki Stjörnunnar og skoraði.

Sandra Hauksdóttir náði í sárabótarmark seint í uppbótartíma eftir hornspyrnu en lengra komust Stjörnukonur ekki. FH fer upp í annað sætið með 42 stig, en Stjarnan í 5. sæti með 28 stig.