Það var nóg um að vera hjá Íslendingunum okkar sem leika erlendis, þar sem Tómas Bent Magnússon kom inn af bekknum og skoraði fjórða markið í frábærum sigri Hearts á heimavelli gegn Dundee FC.
Hearts er afar óvænt á toppi skosku deildarinnar sem stendur, með 29 stig eftir 11 umferðir. Liðið er 9 stigum fyrir ofan ríkjandi meistara Celtic sem eiga þó leik til góða.
Tómas Bent hefur verið að koma inn af bekknum á lokamínútunum í undanförnum leikjum en í dag fékk hann að spila síðustu 20 mínúturnar og nýtti tækifærið með því að skora mark.
Hann innsiglaði 4-0 sigur og er þetta hans fyrsta mark frá félagaskiptunum til Hearts frá Val síðasta sumar.
Í enska boltanum mættu Grimsby Town og Stockport County til leiks í FA bikarnum og unnu sína leiki.
Jason Daði Svanþórsson lék allan leikinn á kantinum í 3-1 sigri Grimsby gegn Ebbsfleet á meðan Benóný Breki Andrésson sat á bekknum í sigri Stockport gegn Tranmere Rovers. Ensku Íslendingaliðin eru þar með komin áfram í næstu umferð bikarsins.
Í næstefstu deild í Danmörku komu hinir efnilegu Ólafur Dan Hjaltason og Jóhannes Kristinn Bjarnason, sem eru báðir fæddir 2005, inn af bekkjunum í jafnteflisleikjum hjá Aarhus Fremad og Kölding.
Aarhus Fremad er í fallbaráttu með 18 stig eftir 15 umferðir, fjórum stigum á eftir Kölding.
Í næstefstu deild í Noregi komu Davíð Snær Jóhannsson og Ólafur Guðmundsson saman inn af bekknum í þægilegum sigri hjá Álasundi gegn Asane. Liðin áttust við í næstsíðustu umferð deildartímabilsins.
Davíð og Ólafur fengu aðeins að spila síðustu tíu mínúturnar í 3-0 sigri sem tryggir Álasundi farmiða í umspilskeppni um sæti í efstu deild.
Álasund á ennþá möguleika á að stela öðru sæti deildarinnar til að komast beint upp um deild, en þeir möguleikar eru afar litlir þar sem bæði liðin í sætunum fyrir ofan, Start og Kongsvinger, þyrftu að tapa eða gera jafntefli í lokaumferðinni.
Tíu leikmenn Odd töpuðu þá á heimavelli gegn Sogndal en Hinrik Harðarson var ónotaður varamaður.
Í sænska boltanum var Daníel Tristan Guðjohnsen ónotaður varamaður í jafntefli hjá Malmö á útivelli gegn Häcken. Malmö tók forystuna snemma leiks en Häcken tókst að jafna á lokamínútunum og var Arnór Sigurðsson ekki í hóp vegna meiðsla.
Malmö er búið að missa af Evrópusæti eftir þetta jafntefli en getur ennþá komist í Evrópu í gegnum sænska bikarinn.
Óskar Tor Sverrisson lék þá allan leikinn í tapi Ariana gegn Jonköping í þriðju efstu deild í sænska boltanum. Ariana siglir lygnan sjó í fimmta sæti deildarinnar á meðan Jonköping stefnir á umspilsleik um sæti í Superettan, næstefstu deild.
Að lokum var Guðmundur Þórarinsson ónotaður varamaður í tapi hjá FC Noah á heimavelli gegn Ararat í toppbaráttunni í armensku deildinni.
Noah er búið að tapa tveimur leikjum í ellefu umferðum á deildartímabilinu og situr í fjórða sæti á stöðutöflunni, sex stigum á eftir toppliði Ararat.
Hearts 4 - 0 Dundee FC
1-0 Lawrence Shankland ('31)
2-0 Pierre Kabore ('38)
3-0 Pierre Kabore ('56)
4-0 Tómas Bent Magnússon ('79)
Grimsby 3 - 1 Ebbsfleet
Tranmere 1 - 3 Stockport
Aarhus Fremad 0 - 0 Hvidovre
Hilleröd 1 - 1 Kölding
Aalesund 3 - 0 Asane
Odd 1 - 4 Sogndal
Hacken 1 - 1 Malmö
Jonköping 1 - 0 Ariana
Noah 1 - 2 Ararat
Athugasemdir
