West Ham United er í næstneðsta sæti úrvalsdeildarinnar og hefur gengið hörmulega bæði fyrir og eftir ráðningu á Nuno Espírito Santo sem aðalþjálfara.

Hamrarnir taka á móti Newcastle United í erfiðum leik. West Ham er aðeins með fjögur stig eftir níu umferðir og þarf á sigri að halda til að nálgast öruggt sæti í deildinni.

Newcastle er átta stigum þar fyrir ofan og þarf á sigri að halda til að fara upp um eitt sæti og jafna Brighton og Aston Villa á stigum um miðja deild.

Stórleikur dagsins fer svo fram í Manchester þar sem lærisveinar Pep Guardiola í liði Manchester City taka á móti spútnik liði Bournemouth. Þar mætast tveir markahæstu menn deildarinnar, Erling Haaland og Antoine Semenyo.

Bournemouth hefur verið að gera magnaða hluti á tímabilinu þrátt fyrir sölur á lykilmönnum í sumarglugganum. Liðið situr í öðru sæti sem stendur, tveimur stigum fyrir ofan City.

Bournemouth er jafnt Englandsmeisturum Liverpool á stigum og með leik til góða. Tapi lærlingar Andoni Iraola í dag falla þeir niður í fjórða sæti.

Premier League
14:00 West Ham - Newcastle
16:30 Man City - Bournemouth