Rómverjar byrjuðu leikinn betur en náðu ekki að skapa sér hættuleg marktækifæri. Heimamenn í Mílanó unnu sig hægt og rólega inn í leikinn og náðu svo forystunni á 39. mínútu þegar miðvörðurinn Strahinja Pavlovic skoraði eftir skyndisókn.

Pavlovic var einn af leikmönnum Milan sem spretti upp völlinn í skyndisóknina og skoraði hann úr dauðafæri eftir frábæran undirbúning frá Rafael Leao.

Milan var sterkara liðið eftir opnunarmarkið og skipti um gír í síðari hálfleik, en Mile Svilar hélt gestunum inni í leiknum með glæsilegum markvörslum.

Þegar tók að líða á seinni hálfleikinn náðu Rómverjar betri fótfestu í leiknum og fengu dæmda vítaspyrnu, en Mike Maignan varði mjög vel frá Paulo Dybala á 82. mínútu til að halda forystunni.

Roma jók sóknarþungan og pressaði grimmt síðustu mínúturnar en tókst ekki að brjóta vörn Milan á bak aftur, svo lokatölur urðu 1-0.

Milan jafnar Roma á stigum með þessum sigri, liðin sitja saman í 2.-4. sæti deildarinnar með 21 stig eftir 10 umferðir. Einu stigi á eftir toppliði Napoli.

Fyrr í dag tók Parma á móti Bologna og náði forystunni strax á fyrstu mínútu. Santiago Castro jafnaði metin fyrir gestina og fékk Christian Ordonez að líta tvö gul spjöld í liði heimamanna.

Staðan var því 1-1 í hálfleik og heimamenn einum leikmanni færri. Bologna nýtti sér liðsmuninn og skoraði tvö mörk í síðari hálfleiknum til að tryggja dýrmætan sigur.

Castro skoraði annað mark áður en vinstri bakvörðurinn Juan Miranda innsiglaði sigurinn á lokamínútum leiksins. Lokatölur 1-3.

Bologna er í fimmta sæti deildarinnar með 18 stig eftir 10 umferðir, fjórum stigum á eftir toppliði Napoli. Parma er aðeins með 7 stig.

Milan 1 - 0 Roma
1-0 Strahinja Pavlovic ('39 )
1-0 Paulo Dybala ('82 , misnotað víti)

Parma 1 - 3 Bologna
1-0 Adrian Bernabe ('1 )
1-1 Santiago Castro ('17 )
1-2 Santiago Castro ('68 )
1-3 Juan Miranda ('92 )
Rautt spjald: Christian Ordonez, Parma ('35)