„Það var rætt að úrvalsdeildin mun ekki hefjast í byrjun maí og að deildin hefjist aðeins að nýju þegar það þykir öruggt og viðeigandi að gera það," sagði í yfirlýsingu deildarinnar í dag.

Þar kom fram að deildin vinni náið með knattspyrnuyfirvöldum og ríkisstjórninni og öðrum viðkomandi að því að finna rétta lausn.

Ljóst sé að það sé markmið allra að þeir leikir sem eru eftir í deildinni og bikarkeppnum muni fara fram til að gæta sanngirni í hverri keppni.

„Hinvegar er ljóst að mótin hefjast ekki aftur nema með stuðningi ríkisstjórnarinnar og þegar heilbrigðissjónarmið leyfa það„" segir í yfirlýsingunni

Leikmenn beðnir um 30% launalækkun

Í yfirlýsingunni sem var send út eftir fundinn í dag kemur ennfremur fram að stefnt sé að viðræðum við leikmenn deildarinnar um að taka á sig verulega launalækkun.

Í því skyni er talað um 30% lækkun launa á ársgrundvelli en stefnt er að fundi milli deildarinnar og leikmannasamtakanna á morgun.

Fjárstyrkir
Félögin tóku einnig ákvörðun um að fjármagna sjóð upp á 125 milljónir punda til að styrkja neðri deildirnar.

Auk þess verði settar 20 milljónir punda til heilbrigðisyfirvalda og þeirra sem eiga um sárt að binda vegna Covid-19 heimsfaraldursins.