Bruno Fernandes hafnaði risasamningi frá Al-Hilal til að vera áfram í Manchester.
Bruno Fernandes fyrirliði Manchester United er búinn að staðfesta að hann hefur hafnað samningstilboði frá Al-Hilal.
Fernandes hafnaði því að fá um það bil fimm sinnum hærri útborguð laun með því að segja nei við Al-Hilal. Samkvæmt fjölmiðlum á Englandi hefði hann fengið 700 þúsund pund í vikulaun í Sádi-Arabíu, skattfrjálst, auk þess að fá veglegan undirritunarbónus við félagaskiptin.
Rúben Amorim, þjálfari Man Utd og samlandi Fernandes, hjálpaði honum að taka ákvörðunina.
„Forsetinn hringdi í mig en ég hafnaði tilboðinu," sagði Fernandes um Al-Hilal.
„Ég talaði við Amorim og hann bað mig um að vera áfram hjá félaginu. Manchester United vildi ekki selja mig og þarf ekki peninginn, en ef ég vildi fara þá hefði ég mátt gera það."
Athugasemdir
