KF hefur farið betur af stað en spámenn í 2. deild bjuggust við. KF er í 7. sæti með fjóra sigra eftir átta leiki. KF var spáð botnsætinu í sumar af öllum nema einum þjálfara í deildinni. Í 8. umferð sigraði liðið gegn Selfossi, liðinu sem spáð var efsta sæti, og kom sigurmarkið undir lok leiksins.

Oumar Diouck, sem skoraði sigurmarkið, er ICE-leikmaður umferðarinnar í 8. umferð 2. deildar. Það er hlaðvarpsþátturinn Ástríðan sem sér um valið á leikmanni umferðarinnar og má hlusta á umræðu um 7. og 8. umferð hér neðst í fréttinni. Umræða um KF hefst eftir um 66 mínútur.

Oumar er fæddur árið 1994 og gekk í raðir KF þegar tímabilið í ár var nýbyrjað. Diouck hefur skorað fjögur mörk í sjö leikjum.

„Aðrir sem komu til greina voru þeir Stefnir Stefánsson og Viktor Örn Guðmundsson," sagði Sverrir Mar Smárason og hélt áfram: „En leikmaður umferðarinnar að þessu sinni er Oumar Diouck, belgíski sóknarmaðurinn hjá KF, sem skoraði sigurmarkið gegn Selfossi."

„Hann gerði einnig tilkall í 7. umferðinni þegar hann skoraði tvö gegn Völsungi. Vinir mínir að norðan segja að þetta sé skemmtilegur strákur," sagði Óskar Smári Haraldsson.