Lionel Messi er að eiga frábært tímabil hjá PSG og gerði dýrmætt sigurmark í gær. Hann skoraði það með skoti utan teigs og er það mark númer 39 sem hann skorar utan vítateigs á undanförnum árum.
Á sama tíma hefur engum leikmanni tekist að skora næstum því jafn mikið og Messi með skotum utan teigs í fimm helstu deildum Evrópu. Kevin De Bruyne, stórstjarna Manchester City, er næstur á lista með 19 mörk.
Sú tölfræði sem vekur þó mesta athygli er að Messi hefur komið að fleiri mörkum á tímabilinu, ef litið er til allra keppna og landslið talin með, heldur en nokkur annar leikmaður. Meira en Erling Braut Haaland sem hefur komið að 34 mörkum í 27 leikjum með Man City.
Messi hefur komið að 38 mörkum í 30 leikjum það sem af er tímabils, sem er einstaklega magnað í ljósi þess að hann mun eiga 36 ára afmæli næsta sumar.
