Fyrirliðinn mættur aftur til æfinga eftir sjö mánaða fjarveru

„Í dag er góður dagur" skrifaði Real Sociedad á Twitter. Fyrirliði liðsins, Mikel Oyarzabal, mætti aftur brosandi til æfinga en hann hefur verið frá vegna meiðsla í sjö mánuði.

Hann æfði þó ekki með liðinu að fullu, tók þátt í hluta af æfingunni, og mun að mestu vera á einstaklingsæfingum á komandi vikum meðan hann vinnur að endurkomunni.

Áður en Oyarzabal meiddist spilaði hann stórt hlutverk í spænska landsliðinu og mögulega á hann enn veika von um að komast í hópinn sem fer á HM. Luis Enrique landsliðsþjálfari Spánar vildi ekki tjá sig um Oyarzabal, hann vilji sjá hvernig næstu vikur þróast.

Oyarzabal er 25 ára sóknarleikmaður sem hefur skorað 6 mörk í 21 landsleik fyrir Spán.