KA hefur formlega tekist að bjarga sér frá falli úr Bestu deild karla eftir að hafa gert 1-1 jafntefli við Vestra í 25. umferð deildarinnar á Greifavellinum í dag.

KA-menn voru lengi vel í tveimur neðstu sætunum og var það ekki fyrr en í seinni hluta mótsins sem liðinu tókst að klifra upp töfluna og koma sér í þægilega stöðu fyrir tvískiptingu.

Vestri hafði á meðan ekki unnið leik síðan það varð bikarmeistari í fyrsta sinn í sögu félagsins og þá var Davíð Smári Lamude látinn taka poka sinn á dögunum. Jón Þór Hauksson tók við keflinu af honum.

Jeppe Pedersen kom Vestra í forystu á 37. mínútu leiksins. Jeppe tók innkast á Diego Montiel sem kom boltanum aftur á Jeppe. Hann kom boltanum fyrir markið, en einhvern veginn fór boltinn í gegnum pakkann og framhjá Rasheed í markinu.

KA-menn í heildina sterkari aðilinn í leiknum og fóru að banka fast á dyrnar þegar leið á seinni hálfleikinn.

Guðjón Ernir Hrafnkelsson kom sér í dauðafæri á 77. mínútu en setti boltann framhjá. Tveimur mínútum síðar fengu Vestra-menn skellinn.

KA fékk aukaspyrnu á fínum stað og var það Hallgrímur Mar Steingrímsson sem setti spyrnuna á hausinn á Hans Viktori Guðmundssyni sem skallaði boltann í netið.

Ótrúlega svekkjandi fyrir Vestra sem er með 28 stig og enn í harðri fallbaráttu þegar tvær umferðir eru eftir en KA í öðru sæti neðri hlutans með 33 stig.

Vestri á nú tvo mikilvæga leiki eftir gegn botnliðum Aftureldingar og KR. Það dugir Vestra líklega að vinna einn leik til að tryggja sæti sitt, en einnig er möguleiki á að markatala ráði úrslitum þegar talið verður upp úr pokanum í lok tímabils.