Valur og Vestri gerðu 1-1 jafntefli í 1. umferð Bestu deildar karla á N1-vellinum á Hlíðarenda í dag. Markamaskínan Patrick Pedersen kom Val til bjargar eftir sjálfsmark Orra Sigurðar Ómarssonar snemma í síðari hálfleiknum.

Valsmenn mættu ákveðnari til leiks og hófu strax orrahríð að marki Vestra.

Tryggvi Hrafn Haraldsson átti skot í stöngina á 4. mínútu og þá bjargaði Sergine Fall á síðustu stundu á 28. mínútu eftir að Patrick Pedersen setti boltann á milli fóta hjá Guy Smit.

Jónatan Ingi Jónsson átti skot rétt yfir markið undir lok hálfleiksins, en vantaði upp á herslumuninn fræga.

Það lifnaði strax yfir þessu í byrjun síðari hálfleiks og voru það Vestra-menn sem komust óvænt í forystu eftir sprellisjálfsmark frá Orra Sigurði Ómarssyni. Hann sendi boltann til baka sem sveif yfir Stefán Þór Ágústsson og í eigið net.

Valsmenn pressuðu á Vestra eftir markið. Tómas Bent Magnússon átti ágætis skalla sem fór rétt yfir markið og þá átti Jónatan Ingi laglegt skot sem var á leiðinni í samskeytin en Smit sá við honum.

Jöfnunarmarkið kom fyrir rest. Aron Jóhannsson átti frábæra sendingu út á vinstri kantinn á Tryggva sem fann Pedersen í hlaupinu og þrumaði hann boltanum í netið.

Gestirnir voru nálægt því að taka aftur forystuna tuttugu mínútum fyrir leikslok. Anton Kralj átti hlaup upp vinstri kantinn og kom með sendinguna á Daða Berg Jónsson sem tók skotið. Boltinn barst aftur út á Anton sem kom honum fyrir á Sergine Fall en Stefán sá við tilraun hans.

Bæði lið reyndu að sækja sigurmarkið en án árangurs og 1-1 jafntefli því niðurstaðan á Hlíðarenda. Valsmenn fengu svo sannarlega færin til þess að vinna leikinn og geta ekki verið sáttir með úrslit dagsins. Gott stig fyrir Vestra sem mætir næst FH á heimavelli á meðan Valur heimsækir KR.