Pablo Punyed (til hægri á myndinni) var ráðinn til Hauka í vetur
Haukar unnu Hvíta riddarann í sjöttu umferð annarrar deildar í kvöld 2-0. Þó Hvíti Riddarinn væri ósigraður í deildinni fyrir þennan leik náði liðið ekki að stöðva sigurgöngu Hauka. Fotbolti.net ræddi við Pablo Punyed, spilandi aðstoðarþjálfara Hauka, að leik loknum.
Lestu um leikinn: Hvíti riddarinn 0 - 2 Haukar
Pablo hrósaði Hvíta riddaranum: "Þeir eru vel þjálfaðir og flottir strákar. Ég ætla að hrósa þeim því þeir eru að fara í vegferð sem er vel gerð. Það var erfitt að spila á móti þeim en frammistaða okkar var mjög góð. Margir fengu mínútur hjá okkur sem eru ekki búnir að spila mikið í sumar og stóðu sig mjög vel."
"Flott vegferð hjá okkur, við erum að reyna að ala upp leikmenn sem eru tilbúnir að taka næsta skref og á sama tíma taka Hauka á næsta stall. Þetta er hægt og rólega að skila sér," sagði Pablo um vegferðina sem félagið er á.
Pablo fór útaf eftir klukkutíma leik. Þá voru Haukar komnir tveimur mörkum yfir.
"Ég vona að ég sjálfur geti spilað minna og minna í sumar svo að strákarnir sem eiga skilið að spila meira geti gert það, þá get ég verið meira á bakvið tjöldin en þetta á eftir að koma í ljós. Mér finnst svo gaman að spila og ég held áfram að gera það," sagði Pablo að lokum.
