Þýskaland: Kane skoraði vítaspyrnutvennu í sigri

Bayern er með níu stiga forystu á Leverkusen á toppi þýsku deildarinnar sem stendur eftir þægilegan sigur á Werder Bremen í kvöld.

Bayern var með mikla yfirburði í leiknum en Werder Bremen komst hvorki lönd né strönd.

Það var hins vegar ekki fyrr en snemma í seinni hálfleik sem Bayern fékk vítaspyrnu. Harry Kane skoraði að öryggi úr henni og kom liðinu yfir.

Undir lok leiksins skoraði Leroy Sane annað markið með skoti á opið markið af stuttu færi. Það var síðan í uppbótatíma sem Kane innsiglaði sigurinn, aftur með marki úr vítaspyrnu.