Liverpool hefur sett 20 milljóna punda verðmiða á skoska vængmanninn Ben Doak. Þetta segir James Pearce hjá Athletic.
Doak er 19 ára gamall og kom til Liverpool frá Celtic fyrir þremur árum.
Hann á 10 leiki með aðalliði Liverpool en eyddi síðustu leiktíð á láni hjá Middlesbrough þar sem hann stóð sig vel og kom að 10 mörkum í B-deildinni.
Skotinn hefur heillað með Liverpool á undirbúningstímabilinu en það gæti samt farið svo að hann verði seldur og vill félagið fá 20 milljónir punda. Leeds United og West Ham eru áhugasöm auk þess sem Bologna og Mónakó eru sögð fylgjast náið með stöðunni.
Ef Liverpool tekst ekki að fá tilboð sem samsvarar verðmiðanum mun það með glöðu geði halda honum og hafa hann í hópnum fyrir komandi tímabil.
Liverpool hefur verið duglegt að kaupa og selja í sumarglugganum, en það hefur fengið Florian Wirtz, Jeremie Frimpong, Hugo Ekitike og Milos Kerkez á meðan það hefur selt Caoimhin Kelleher, Jarell Quansah, Tyler Morton, Nat Phillips, Luis Díaz og Trent Alexander-Arnold.
Darwin Nunez er á förum til Sádi-Arabíu og gætu fleiri leikmenn yfirgefið félagið áður en glugginn lokar.
Athugasemdir
