Toppliðið átti fínustu byrjun á leiknum og var líklegra til árangurs, en Southampton vann sig hægt og rólega inn í leikinn og fór að ógna þegar leið á hálfleikinn.

Fyrr á tímabilinu lenti Liverpool einmitt undir gegn Southampton og vann þann leik 3-2 og var svipað upp á teningnum í dag.

Alisson og Virgil van Dijk gerðu sig seka um sjaldgæf mistök undir lok fyrri hálfleiks. Will Smallbone fékk boltann í teignum, en missti hann aðeins frá sér. Van Dijk náði að skýla boltanum í von um að Alisson kæmi út og handsamaði boltann.

Brasilíumaðurinn lenti hins vegar á Mateus Fernandes og náði því ekki valdi á boltann sem endaði með því að boltinn datt aftur út á Smallbone sem skoraði nokkuð einfalt mark með því að rúlla boltanum í netið.

Pirringur kom í Liverpool-menn og fékk Darwin Nunez meðal annars heimskulegt gult spjald fyrir óþarfabrot, en heimamenn náðu að stilla saman strengi í hálfleik og var þetta aldrei spurning í þeim síðari.

Nunez jafnaði metin á 52. mínútu eftir frábæran undirbúning Luis Díaz. Kólumbíumaðurinn keyrði upp að endalínu og fann Nunez á nærsvæðinu. Úrúgvæinn tók góða innkomu gegn PSG í miðri viku með sér í leikinn og skoraði úr færinu.

Mínútu síðar var hann búinn að næla í vítaspyrnu fyrir Liverpool er Smallbone sparkaði aftan í ökklann á honum. Mohamed Salah skoraði sitt 26. deildarmark á tímabilinu úr vítinu.

Á lokakafla leiksins fengu Liverpool-menn aðra vítaspyrnu er Yukinari Sugawara handlék boltann í teignum. Aftur fór Salah á punktinn og aftur skoraði hann. 27. mark hans og hefur hann nú komið að 44 mörkum á tímabilinu.

Hann færist nú nær meti Alan Shearer og Andy Cole sem komu að 47 mörkum á einu tímabili en það er þó vert að taka það fram að þá voru spilaðir 42 leikir.

Tvö mörk frá Salah í góðum endurkomusigri og Liverpool með sextán stiga forystu í efsta sæti deildarinnar, en Southampton áfram á botninum með aðeins 9 stig.

Joao Pedro var hetja Brighton sem vann Fulham, 2-1, á AMEX-leikvanginum í Brighton.

Raul Jimenez skoraði laglegt mark fyrir Fulham á 35. mínútu en Jan Paul van Hecke náði inn jöfnunarmarki fyrir Brighton aðeins sex mínútum síðar.

Seint í uppbótartíma síðari hálfleiks fengu heimamenn vítaspyrnu er Harrison Reed fór í klaufalega tæklingu á Joao Pedro í teignum og fór Brasilíumaðurinn sjálfur á punktinn og tryggði heimamönnum stigin þrjú.

Brighton er í baráttu um að komast í Evrópukeppni en liðið er í 6. sæti með 46 stig, sætinu sem gefur þátttökurétt í Sambandsdeild Evrópu. Fulham er í 9. sæti með 42 stig.

Ismaila Sarr skoraði þá eina mark Crystal Palace í 1-0 sigri á nýliðum Ipswich Town.

Senegalinn fékk boltann í teignum og nýtti allan sprengikraft sinn í að komast framhjá varnarmanni Ipswich áður en hann vippaði boltanum yfir Alex Palmer og í netið.

Sterkur sigur hjá Palace sem er í 11. sæti með 39 stig en Ipswich í 18. sæti með 17 stig.

Brighton 2 - 1 Fulham
0-1 Raul Jimenez ('35 )
1-1 Jan Paul van Hecke ('41 )
2-1 Joao Pedro ('90 , víti)

Crystal Palace 1 - 0 Ipswich Town
1-0 Ismaila Sarr ('82 )

Liverpool 3 - 1 Southampton
0-1 William Smallbone ('45 )
1-1 Darwin Nunez ('51 )
2-1 Mohamed Salah ('54 , víti)
3-1 Mohamed Salah ('88 , víti)