Argentínski miðjumaðurinn Alexis Mac Allister á rúmlega tvö ár eftir af samningi sínum við stórveldi Liverpool en það eru engar viðræður hafnar um nýjan samning.
Carlos Mac Allister, faðir og umboðsmaður Alexis, greindi frá þessu á dögunum. Það var uppi orðrómur um viðræður Liverpool við Mac Allister um nýjan samning, en Carlos segir ekkert vera til í því.
„Það eru engar viðræður í gangi við Liverpool um samningsmál," sagði Carlos.
Mac Allister er 27 ára gamall og hefur komið að 36 mörkum með beinum hætti í 136 leikjum hjá Liverpool. Hann er mikilvægur hlekkur á miðjunni og hefur spilað 41 leik í öllum keppnum á tímabilinu.
Miðjumanninum líður vel hjá Liverpool og er búist við að félagið muni bjóða honum nýjan samning næsta sumar. Mac Allister var keyptur til Liverpool úr röðum Brighton fyrir 35 milljónir punda sumarið 2023 og er bæði ríkjandi heimsmeistari og Suður-Ameríkumeistari með argentínska landsliðinu.
„Alexis er einbeittur að því að halda áfram að gera vel fyrir Liverpool til að vinna sér inn nýjan samning."
Paul Joyce hjá The Times greindi frá því á dögunum að Liverpool sé í viðræðum við Dominik Szoboszlai um nýjan samning og að stjórnendur hefðu sett sig í samband við Carlos Mac Allister til að spyrja út í samningsviðræður, en Carlos neitar fyrir það.
Athugasemdir
