Nýr þjálfari spænska landsliðsins er Luis de la Fuente sem hefur stýrt spænska U21 liðinu frá 2018. Þar áður var hann þjálfari U19 landsliðsins og því þekkir hann vel til hjá spænska fótboltasambandinu.

De la Fuente, sem er 61 árs, spilaði með Athletic Bilbao, Sevilla og Alaves á sínum leikmannaferli. Sem þjálfari á hann ekki mikinn félagsliðaferil að baki; stærst var það þegar hann stýrði Alaves í þrjá mánuði fyrir tólf árum síðan.

Hann verður kynntur til leiks fyrir spænsku þjóðinni í hádeginu á mánudag.

Spánverjar ollu vonbrigðum á HM í Katar þar sem þeir töpuðu fyrir Marokkó í 16-liða úrslitunum.