Jose Mourinho, þjálfari Roma á Ítalíu, tók góða yfirferð á þjálfaraferli hans á Englandi með þáttastjórnandanum heimsfræga, James Corden, í einkaviðtali á The Sun.
Mourinho tók við United sumarið 2016 og fékk hann leikmenn á borð við Zlatan Ibrahimovic og Paul Pogba til félagsins.
Á fyrsta tímabili tókst honum að vinna Evrópudeildina og tímabilið á eftir lenti liðið í öðru sæti.
Hann var síðan rekinn undir lok árs 2018 og tók Ole Gunnar Solskjær við starfinu en Mourinho telur þó að það sé mikill munur á umfjöllun um hann og Solskjær.
Ole Gunnar stýrði Man Utd í úrslit Evrópudeildarinnar en tapaði fyrir Villarreal og þá náði hann öðru sæti deildarinnar en Mourinho vann Evrópudeildina árið 2017 og lenti í 2. sæti deildarinnar ári síðar.
„Ég lenti í öðru sæti með Man Utd en það var talið slæmt tímabil," sagði Mourinho.
„Núna lendir Man Utd í öðru sæti og tapar í úrslitum Evrópudeildarinnar en það eru framfarir."
„Þetta er bara af því félagið hefur lagt mikla vinnu í samstarf með fjölmiðlum og Ole á fleiri vini sem starfa í fjölmiðlum heldur en ég," sagði hann ennfremur.
Athugasemdir
