Umboðsmaður Hector Bellerin er staddur í London í dag þar sem hann er í viðræðum við Arsenal um riftun á samningi skjólstæðings síns.
Hægri bakvörðurinn var mikilvægur hlekkur í liði Arsenal en hefur ekki verið samur eftir slæm meiðsli á hné. Bellerin gerði góða hluti að láni hjá Real Betis á síðustu leiktíð og vill ólmur ganga aftur í raðir félagsins.
Hann á aðeins eitt ár eftir af samningi sínum við Arsenal og vill fá að rifta honum til að fara til Betis á frjálsri sölu.
Bellerin er 27 ára gamall og gaf fimm stoðsendingar í 32 leikjum með Betis á síðustu leiktíð.
Hann lék 239 leiki á tíma sínum hjá Arsenal sem stal honum úr akademíu Barcelona þegar bakvörðurinn var aðeins 16 ára gamall.
Talið er að viðræðurnar um riftun á samningi séu aðeins formsatriði þar sem Mikel Arteta telur sig ekki hafa not fyrir Bellerin.