Gunnar Magnús Jónsson
„Mér fannst við fara full varlega af stað inn í leikinn og FH liðið mun sterkara en mér fannst við vaxa inn í leikinn. Við hefðum að sjálfsögðu viljað setja mark í leikinn í fyrri hálfleik en það gekk því miður ekki. Mér fannst stelpurnar vera að leggja sig fram í dag en í síðasta leik var frammistaðan mjög döpur. Það var allavega verið að reyna og eins og lið í okkar stöðu þarf að gera að selja sig dýrt. En FH liðið á fullt hrós skilið í dag.“ Sagði svekktur þjálfari Fylkis Gunnar Magnús Jónsson eftir 3-1 tap Fylkis gegn FH í viðureign liðanna á Kaplakrikavelli fyrr í kvöld.
Lestu um leikinn: FH 3 - 1 Fylkir
Fylkisliðið skapaði sér nokkrar álitlegar stöður í fyrri hálfleik og ógnaði liði FH talsvert og þá sérstaklega úr föstum leikatriðum. Minna varð af því í síðari hálfleik en hvað skyldi hafa ollið?
„Mér fannst þær bara vera "physical" sterkar á móti okkur og við vorum svolítið undir í þeirri baráttu. Þá er kannski erfiðara að skapa sér eitthvað. Svo þegar fór að líða á leikinn þá fórum við að opna okkur, við þurftum stig og vorum að sækja það og fáum á okkur mark í andlitið. Við fáum á okkur þrjú mörk en þetta er í fyrsta sinn sem við fáum á okkur meira en eitt mark í seinni umferðinni svo vörnin hefur verið að halda mjög vel.“
Annað mark FH kom upp úr vítaspyrnu sem dæmd var fyrir hendi í vítateig Fylkis. Hvernig horfði sá dómur við Gunnari en skiptar skoðanir voru um réttmæti þess dóms þá er varðar náttúrulega stöðu handar varnarmanns og annað.
„Þetta er spurning sem við í fótboltaheiminum erum margoft að velta fyrir okkur. Það vantar kannski skýrari reglur, En eins og þetta horfir við mér er þetta hörkuskot sem FH stelpan á á markið. Varnarmaðurinn er ekkert að gera sig breiða, hún stendur bara og fær boltann beint í hendina. En ég veit ekki hvað það er, eru þeir að meta að boltinn sé á leiðinni í netið eða hvað? Boltinn fór klárlega í hendina á henni en þetta er bara þessi endalausa umræða um vítaspyrnudóma og hendi.“
Sagði Gunnar Magnús en allt viðtalið má sjá hér að ofan.
