Fótbolti.net

þri 10. mars 2026 06:00

Ívan Guðjón Baldursson

Nuno: Við getum farið alla leið

Mynd: EPA

Nuno Espírito Santo var mjög ánægður eftir að lærlingar hans í liði West Ham United lögðu Brentford að velli í 16-liða úrslitum enska bikarsins í gærkvöldi.

Nuno gerði sjö breytingar á byrjunarliðinu til að hvíla lykilmenn fyrir komandi átök í fallbaráttunni og var mjög ánægður með framlag sinna manna. Hamrarnir náðu forystunni í tvígang en Brentford tókst að jafna í bæði skiptin og endaði leikurinn í vítaspyrnukeppni.

„Ég er virkilega stoltur af leikmönnum og stuðningsmönnum. Stuðningsmenn eiga þennan sigur skilið fyrir að hafa stutt við bakið á okkur í gegnum djúpa dali. Við spiluðum flottan leik í dag og erum himinlifandi með að fara áfram í næstu umferð," sagði Espírito Santo, en West Ham tekur á móti Leeds United í 8-liða úrslitunum. Liðin eru bæði í fallbaráttu í úrvalsdeildinni.

„Strákarnir spiluðu virkilega vel gegn mjög sterkum andstæðingum. Við stjórnuðum hraðanum og sköpuðum mikið af færum í opnum og skemmtilegum leik. Bæði lið voru að spila til að vinna. Það er mikilvægt að strákarnir trúi því að við getum farið alla leið í þessari keppni, núna erum við bara einum leik frá Wembley.

„Ég er mjög ánægður með strákana sem hafa ekki fengið mörg tækifæri síðustu vikur, þeir stóðu sig vel í dag. Það eru margir leikmenn sem leggja mikið á sig á hverri einustu æfingu en fá svo ekki endilega að spila. Þeir stóðu sig vel í dag og ég er ánægður, það er mikilvægt að hafa virka samkeppni um byrjunarliðssæti."

West Ham tekur á móti stórveldi Manchester City um næstu helgi áður en liðið heimsækir Aston Villa í erfiðum úrvalsdeildarslag fyrir landsleikjahléð í lok mánaðar.

Nuno veit að þetta verða afar erfiðir leikir en markmiðið er að reyna að fá eitthvað úr þeim. Hamrarnir eru í fallsæti sem stendur, með 28 stig eftir 29 umferðir.

Nuno var að lokum spurður út í Crysencio Summerville sem hefur verið besti leikmaður West Ham á árinu. Hann kom inn af bekknum gegn Brentford en meiddist í framlengingunni.

„Hann fann fyrir höggi og við vitum ekki alveg hversu alvarlegt þetta er. Við höfum áhyggjur en við getum ekki gert neitt nema að bíða eftir niðurstöðum úr rannsóknum.

„Núna fer öll einbeitingin á endurheimt til að vera tilbúnir í slaginn fyrir leikinn gegn City. Við njótum sigursins í nokkrar klukkustundir í kvöld en svo þurfum við að setja alla einbeitingu á næsta leik."

		L	U	J	T	ms:	mf:	mun	Stig
1	Arsenal	33	21	7	5	63	26	+37	70
2	Man City	32	20	7	5	65	29	+36	67
3	Man Utd	33	16	10	7	58	45	+13	58
4	Aston Villa	33	17	7	9	47	41	+6	58
5	Liverpool	33	16	7	10	54	43	+11	55
6	Brighton	34	13	11	10	48	39	+9	50
7	Chelsea	34	13	9	12	53	45	+8	48
8	Brentford	33	13	9	11	48	44	+4	48
9	Bournemouth	33	11	15	7	50	50	0	48
10	Everton	33	13	8	12	40	39	+1	47
11	Sunderland	33	12	10	11	36	40	-4	46
12	Fulham	33	13	6	14	43	46	-3	45
13	Crystal Palace	32	11	10	11	35	36	-1	43
14	Newcastle	33	12	6	15	46	49	-3	42
15	Leeds	33	9	12	12	42	49	-7	39
16	Nott. Forest	33	9	9	15	36	45	-9	36
17	West Ham	33	8	9	16	40	57	-17	33
18	Tottenham	33	7	10	16	42	53	-11	31
19	Burnley	33	4	8	21	34	67	-33	20
20	Wolves	33	3	8	22	24	61	-37	17