KF sigraði Dalvík/Reyni, 2-4, á útivelli í nágrannaslag í síðustu umferð 2. deildar karla. Hrannar Snær Magnússon skoraði annað mark KF í leiknum og var hann maður leiksins. Hrannar er leikmaður 4. umferðar 2. deildar á Fótbolti.net

Sigurinn var annar sigur KF í röð, liðið sigraði Kára fyrir rúmri viku en hafði tapað fyrstu tveimur leikjunum í deildinni. Hrannar var í viðtali við Fótbolta.net eftir leikinn sem má hlusta á í heild sinni hér neðst í fréttinni.

Hrannar var spurður út í uppáhaldsleikstöðu á vellinum, hann spilaði í vinstri bakverði á þriðjudaginn og gegn Kára var hann í hægri bakverðinum. Hann hefur einnig spilað framar á vellinum á tímabilinu.

„Það er mjög erfitt að svara. Ég hef spilað á kanti, miðju og bakverði. Ég veit ekki hvað er uppáhalds en ég er vanur í bakverðinum, hef spilað mest þar."

Hrannar var spurður út í framhaldið eftir sigurinn á þriðjudag, KF mætir Njarðvík í Njarðvík í dag.

„Við höldum bara áfram og förum 100% inn í alla leiki. Ætlum okkur góða hluti í þessari deild," sagði Hrannar.