Lestu um leikinn: Breiðablik 2 -  0 Fylkir

Fylkismenn héldu út fyrri hálfleikinn gegn Blikum en fengu á sig tvö mörk snemma í þeim seinni.

Atli segir að sóknaraðgerðir liðsins í dag hafi ekki verið nógu góðar og segir hans menn hafa spilað of aftarlega.

„Við ætluðum okkur meira og við höfðum alla burði til að gera það en vorum of ragir í okkar sóknaraðgerðum. Við vorum búnir að fara yfir svæðin sem við ætluðum að sækja í í vikunni en gerðum of lítið af því og vorum passívir," sagði Atli.

„Varnarskipulagið hélt fínt í fyrri hálfleik og við náðum að loka á flest sem þeir voru að gera en við þurfum að skapa okkur miklu meira, ekki spurning."

Blikar tóku forystuna eftir aðeins 40 sekúndur í seinni hálfleik og segir Atli það hafa verið gjöf frá gestaliðinu.

„Þetta var bara gjöf frá okkur og pínu högg í magann. Það slökknar á mönnum sem á ekki að gerast en gerist stundum. 2-0 er klaufalegt eftir það þar sem við eigum að geta varist betur."

„Við erum fyrst og fremst svekktir með að hafa ekki fengið neitt úr úr leiknum en vð þurfum að bæta okkur í báðum vítateigunum. Við þurfum að komast inn í sóknarvítateiginn, við erum ekki nógu hættulegir."