Gerard Lopez, forseti Lille, er búinn að staðfesta að Nicolas Pepe verður seldur frá félaginu í sumar.
Pepe hefur verið lykilmaður hjá Lille undanfarin ár og vakið athygli helstu stórliða Evrópu, en hann er aðeins 23 ára gamall.
Með Pepe í fararbroddi hefur Lille átt ótrúlegt tímabil og er sem stendur í öðru sæti frönsku deildarinnar, sem gefur þátttökurétt í riðlakeppni Meistaradeildarinnar. Til samanburðar endaði félagið einu stigi fyrir ofan fallsvæðið í fyrra.
Pepe leikur sem kantmaður og er búinn að skora 19 mörk í 34 leikjum á tímabilinu. Auk þess er hann búinn að leggja 12 mörk upp, en í fyrra skoraði hann 14 mörk í 38 leikjum.
Pepe hefur gert 3 mörk í 10 landsleikjum með Fílabeinsströndinni og er FC Bayern líklegasti áfangastaður hans. Samningur Pepe rennur þó ekki út fyrr en eftir þrjú ár, HM-sumarið 2022.
„Það er klárt að hann mun skipta um félag í sumar. Við eigum einfaldlega ekki efni á því að halda honum," sagði Lopez á Telefoot í dag.
Arsenal og Manchester United hafa verið orðuð við Pepe en Paris Saint-Germain hefur einnig áhuga á honum. Fjölmiðlar eru sammála um að Pepe muni velja Bayern, en verðmiðinn á honum er í kringum 50 milljónir evra.
Arsenal hefur fylgst með kantmanninum í nokkur ár en aldrei tekist að landa honum. Félagið getur ekki keppt við Bayern og PSG á markaðinum.
Athugasemdir