Það var nóg um að vera í undankeppni fyrir EM U21 landsliða í dag þar sem Spánn tók meðal annars á móti Finnlandi.
Finnar tóku óvænt forystuna í síðari hálfleik og héldu henni allt þar til á 90.mínútu, þegar Eliezer Mayenda leikmaður Sunderland jafnaði metin.
Gonzalo García framherji Real Madrid gerði svo sigurmark á 93. mínútu til að tryggja 2-1 endurkomusigur Spánverja. Spánn er því áfram með fullt hús stiga eftir þrjár umferðir en Finnar eiga sex stig eftir stórsigra gegn San Marínó og Kýpur í fyrstu umferðunum.
Francesco Camarda, 17 ára liðsfélagi Þóris Jóhanns Helgasonar hjá Lecce, gerði þá tvennu í stórsigri Ítalíu gegn Armeníu, en öll mörk leiksins komu í síðari hálfleik. Davide Bartesaghi hjá AC Milan og Luca Koleosho, leikmaður Burnley á láni hjá Espanyol, áttu stoðsendingar og klúðraði Cher Ndour, leikmaður Fiorentina, vítaspyrnu.
Hinn bráðefnilegi Rodrigo Mora var meðal markaskorara í ellefu marka sigri Portúgal gegn Gíbraltar og þá skoraði Tomasz Pienko þrennu í sex marka sigri Póllands í Svíþjóð. Svíar eiga aðeins þrjú stig eftir fjórar umferðir.
Þýskaland lenti undir í fyrri hálfleik í Norður-Írlandi en sneri stöðunni við í seinni hálfleik með mörkum frá Assan Ouedraogo og Dzenan Pejcinovic, leikmönnum RB Leipzig og Wolfsburg. Þjóðverjar töpuðu gegn Grikkjum í síðustu umferð og eru því með sex stig eftir þrjá leiki.
Belgía vann 2-0 gegn Danmörku og Sviss lagði Færeyjar að velli á meðan Gabriele Biancheri, leikmaður í unglingaliði Manchester United, skoraði í sigri Wales gegn Austurríki.
Lettland 0 - 1 Grikkland
Aserbaídsjan 3 - 3 Skotland
Ísland 2 - 1 Lúxemborg
Austurríki 0 - 2 Wales
Búlgaría 2 - 1 Tékkland
Króatía 1 - 0 Úkraína
Ungverjaland 1 - 1 Tyrkland
Kósovó 7 - 0 San Marínó
Svartfjallaland 3 - 2 N-Makedónía
Rúmenía 2 - 0 Kýpur
Slóvakía 2 - 0 Moldóva
Slóvenía 0 - 2 Bosnía
Svíþjóð 0 - 6 Pólland
Ítalía 5 - 1 Armenía
N-Írland 1 - 2 Þýskaland
Spánn 2 - 1 Finnland
Færeyjar 1 - 3 Sviss
Gíbraltar 0 - 11 Portúgal
Malta 0 - 5 Georgía
Belgía 2 - 0 Danmörk
Athugasemdir
