Lestu um leikinn: Breiðablik 1 -  1 ÍBV

Breiðabliki hefur verið að ganga herfilega á síðustu vikum og þurfti liðið á sigri að halda á heimavelli gegn ÍBV í dag til að reyna að halda í við titilbaráttuliðin. Að sama skapi þurftu Eyjamenn á sigri að halda til að koma sér upp í efri hluta Bestu deildarinnar fyrir tvískiptingu.

Íslandsmeistararnir áttu fyrstu marktilraunir leiksins en Eyjamenn tóku svo forystuna á 27. mínútu eftir mikinn atgang. Anton Ari Einarsson varði fyrst marktilraun frá gestunum og tók svo líka frákastið en að lokum datt boltinn fyrir Sverri Pál Hjaltested sem skoraði af harðfylgi.

Bæði lið fengu færi til að bæta marki við leikinn en staðan var 0-1 í leikhlé. Blikar meira með boltann en áttu erfitt með að finna glufur á varnarleik gestanna. Þeir áttu marktilraunir utan vítateigs á meðan Eyjamenn voru hættulegri í sínum sóknaraðgerðum.

Síðari hálfleikurinn var skemmtilegur og fengu bæði lið góð færi til að skora sem nýttust ekki. Blikar voru byrjaðir að banka á dyrnar og tókst þeim að jafna eftir fyrirgjöf á 82. mínútu. Tobias Thomsen skallaði fyrirgjöf frá Kristni Jónssyni laglega í netið.

Áfram var nokkuð jafnt á vellinum og reyndu bæði lið að sækja sigurmark, en án árangurs. ÍBV fékk bestu færin en Anton Ari bjargaði heimamönnum. Lokatölur 1-1.

Þetta þýðir að Íslandsmeistararnir eru átta stigum frá toppnum, með fimm leiki eftir óspilaða í efri hlutanum.

Eyjamenn þurfa þá að berjast um í neðri hlutanum þar sem þeir eiga 29 stig og eru 7 stigum fyrir ofan fallsæti eftir gott gengi síðustu vikna.

Þetta var sjöundi deildarleikur Blika í röð án sigurs.