Sanda María Jessen, leikmaður Þór/KA.
„Þetta voru mjög góð þrjú stig sem við fengum í dag," sagði Sandra María Jessen, leikmaður Þór/KA sem var á skotskónum í dag þegar liðið gerði góða ferð í Árbæinn og vann þar 4-1 sigur á Fylki.
Lestu um leikinn: Fylkir 1 - 4 Þór/KA
Þór/KA lenti undir snemma leiks eftir þrumufleyg frá Ruth Þórðar Þórðardóttur.
„Það var alveg gegn gangi leiksins. Við byrjuðum miklu sterkari en þær en þær skoruðu úr frábæru skoti sem við áttum engan séns í. Við ákváðum að gefa ennþá meira í, eftir markið þeirra," sagði Sandra en það tók Þór/KA ekki langan tíma að jafna metin.
„Það var mjög mikilvægt að jafna snemma eftir markið þeirra. Svo þær gefi sér ekki vonir um að skora fleiri mörk. Það var því sterkt hjá okkur að ná því."
„Það gengur rosalega vel hjá okkur núna. Við erum búnar að vinna fimm leiki í röð og það er markmiðið að halda því áfram. Þetta hefur verið kaflaskipt hjá okkur í sumar. Við erum á góðri siglingu núna og ætlum að reyna halda því áfram út tímabilið," sagði Sandra sem skoraði eitt mark í leiknum og er þar með komin með tólf mörk í deildinni í sumar, tveimur mörkum á eftir markahæsta leikmanni deildarinnar, Fanndísi Friðriksdóttur.
„Ég geri mitt besta. Það sem skiptir mestu máli er að liðið vinni, þá er ég ánægð," sagði hin hógværa, Sandra María Jessen að lokum.
Viðtalið í heild sinni við Söndru Maríu er hægt að sjá í sjónvarpinu hér að ofan.
