Moyes er mikill aðdáandi Bale og reyndi að fá hann til Manchester United árið 2013.

Bale ákvað hins vegar að fara til Spánar og spila með Real Madrid en Man Utd bauð velska landsliðsmanninum töluvert hærri fjárhæðir fyrir að spila á Old Trafford.

„Gareth Bale var líklega fyrsta nafnið sem ég hugsaði um þegar ég tók við Man Utd. Ég hugsaði að hann væri rétti leikmaðurinn fyrir liðið," sagði Moyes.

„Man Utd er með ríka sögu af vængmönnum en þar má nefna bæði George Best og Ryan Giggs og fleiri. Ég vildi að Bale yrði fyrstu kaup mín en viðræður hans við Real Madrid voru komnar langt á veg. Ég reyndi að stela honum og Man Utd bauð honum meiri pening."

„Við reyndum allt sem við gátum til að fá hann. Við vorum með þyrlu klára á æfingasvæðinu til að ná í hann og fara með hann til Manchester. Við töldum okkur eiga möguleika en hann valdi Real Madrid og tók þar frábæra ákvörðun því hann vann Meistaradeildina fjórum sinnum og hefur átt magnaðan feril til þessa," sagði Moyes í lokin.

Bale er á láni hjá Tottenham frá Real Madrid og gæti spilað sinn fyrsta leik gegn West Ham á sunnudag.