Fótbolti.net

mið 04. mars 2026 07:30

Ívan Guðjón Baldursson

Slot: Sama gamla sagan

Mynd: EPA

Arne Slot, þjálfari Englandsmeistara Liverpool, var vonsvikinn eftir óvænt tap gegn botnliði Wolves í ensku úrvalsdeildinni í gærkvöldi.

Úlfarnir áttu góðan leik og unnu með marki í uppbótartíma, en Liverpool er það lið deildarinnar sem hefur tapað flestum leikjum í uppbótartíma það sem af er tímabils.

Þetta er fimmti tapleikur Liverpool í uppbótartíma á deildartímabilinu, sem er met í sögu úrvalsdeildarinnar. Aldrei áður hefur einu liði tekist að tapa fimm leikjum eða meira með mörkum í uppbótartíma á sama tímabili.

„Þetta eru slæm úrslit. Við vorum langt frá því að vera nægilega góðir í fyrri hálfleik en seinni hálfleikurinn var betri. Við sýndum meiri ákefð og sköpuðum góð færi en svo skoruðu þeir úr sínu fyrsta marktækifæri," sagði Slot eftir tapið. „Við brugðumst vel við opnunarmarkinu með því að skjóta í stöngina og svo jafnaði Mo Salah skömmu síðar. Eftir það fengum við tvö góð færi til að skora sigurmarkið."

Brasilíski miðjumaðurinn André gerði sigurmark Úlfanna á 94. mínútu með skoti sem fór af varnarmanni og endaði í netinu. Hann skoraði eftir að liðsfélagar hans höfðu unnið boltann hátt uppi á vellinum eftir misheppnaða hreinsun frá Alisson Becker sem var undir pressu.

„Að lokum fengum við mark á okkur með skoti sem breytti um stefnu af varnarmanni. Það er varla hægt að kalla þetta marktækifæri en boltinn rataði í netið. Við gáfum þeim varla færi á okkur en samt skoruðu þeir tvö mörk. Við sköpuðum talsvert meira heldur en þeir en skoruðum bara eitt mark og þess vegna er niðurstaðan 2-1 tap.

„Við höfum verið að tapa alltof mikið af stigum og þá sérstaklega í uppbótartíma."

Þetta tap kemur sér illa fyrir meistaradeildarvonir Liverpool þar sem liðið situr í fimmta sæti úrvalsdeildarinnar sem stendur, með 48 stig eftir 29 umferðir.

„Þetta er ekki í fyrsta sinn sem við töpum stigum gegn fallbaráttuliðum en við erum heldur ekki fyrsta liðið sem er að tapa stigum hérna. Í síðustu viku var það Aston Villa og þar á undan var það Arsenal. Við vorum að keppa við lið sem er í miklu stuði þessa dagana, við vorum betra liðið á vellinum en töpuðum samt. Þetta er sama gamla sagan.

„Væntingarnar mínar hafa breyst nokkrum sinnum í gegnum tímabilið útaf því að ég bjóst við meiru frá okkur. Þetta er annað bakslag fyrir okkur, við erum ekki að gera sjálfum okkur neina greiða."

Liverpool spilar aftur á Molineux leikvanginum á föstudaginn þegar lærlingar Slot heimsækja Úlfana í 16-liða úrslitum FA bikarsins.

„Það er jákvætt, strákarnir hafa þá eitthvað til að sanna á föstudaginn."

		L	U	J	T	ms:	mf:	mun	Stig
1	Arsenal	33	21	7	5	63	26	+37	70
2	Man City	32	20	7	5	65	29	+36	67
3	Man Utd	33	16	10	7	58	45	+13	58
4	Aston Villa	33	17	7	9	47	41	+6	58
5	Liverpool	33	16	7	10	54	43	+11	55
6	Brighton	34	13	11	10	46	39	+7	50
7	Chelsea	34	13	9	12	53	43	+10	48
8	Brentford	33	13	9	11	48	44	+4	48
9	Bournemouth	33	11	15	7	50	50	0	48
10	Everton	33	13	8	12	40	39	+1	47
11	Sunderland	33	12	10	11	36	40	-4	46
12	Fulham	33	13	6	14	43	46	-3	45
13	Crystal Palace	32	11	10	11	35	36	-1	43
14	Newcastle	33	12	6	15	46	49	-3	42
15	Leeds	33	9	12	12	42	49	-7	39
16	Nott. Forest	33	9	9	15	36	45	-9	36
17	West Ham	33	8	9	16	40	57	-17	33
18	Tottenham	33	7	10	16	42	53	-11	31
19	Burnley	33	4	8	21	34	67	-33	20
20	Wolves	33	3	8	22	24	61	-37	17