Kári vill meina að umræðan hafi verið á þann veg í sumar að Breiðablik sé besta liðið á Íslandi. Hann er ekki sammála því.

„Það verður gaman að sjá hverjir segja að við séum ekki bestir eftir þetta. Það verður gaman að fylgjast með umræðunni um það hvort Breiðablik sé enn besta liðið á Íslandi," sagði Kári við Stöð 2 Sport eftir leikinn.

„Við stimpluðum okkur í sögubækurnar og sönnuðum að við séum besta lið Íslands."

Kári var spurður nánar út í þetta í samtali við Fótbolta.net eftir leikinn.

„Mér finnst svo gaman þegar Blikar - sem virðast stjórna fjölmiðlum - byrja að blaðra um þetta. Hvað ætlarðu að segja? Við töpuðum tveimur leikjum á tímabilinu og ég held að þeir hafa tapað sex."

„Hvað viltu meira?"

Kári var að leggja skóna á hilluna eftir glæstan feril. Hann verður núna yfirmaður knattspyrnumála hjá Víkingi og mun hjálpa félaginu að byggja ofan á þennan árangur.