Lærisveinar Ange Postecoglou í Nottingham Forest eru úr leik í enska deildabikarnum eftir að hafa kastað frá sér tveggja marka forystu í 3-2 tapi gegn Swansea í kvöld.

Brasilíumaðurinn Igor Jesus skoraði bæði mörk Forest í fyrri hálfleiknum. Fyrra markið gerði hann á 15. mínútu með skoti af stuttu færi og annað eftir frábæra sókn þar sem Forest-menn spiluðu 'Tiki-Taka' bolta af bestu gerð.

Markaskorarinn Igor Jesus og varnarmaðurinn Morato komu út af í hálfleik og þá komu Dilane Bakwa og Douglas Luiz einnig af velli hálftíma fyrir leikslok.

Breytingarnar höfðu mikil áhrif á leikinn hjá báðum liðum því Swansea tókst að skora þrjú mörk á síðustu tuttugu mínútunum eða svo.

Cameron Burgess minnkaði muninn á 68. mínútu og jafnaði varamaðurinn Zan Vipotnik metin á þriðju mínútu í uppbótartíma.

Swansea-menn voru ekki hættir. Endurkoman gaf þeim trú á að þeir gætu farið beint áfram og skilaði hún sigrinum í kvöld. Burgess gerði sigurmarkið á sjöundu mínútu í uppbótartíma.

Ethan Galbraith átti þetta þrumuskot fyrir utan teig sem hafnaði í þverslá og var Burgess fyrstur að átta sig í teignum með öðru hörkuskoti og í netið fór boltinn.

Geggjuð endurkoma Swansea sem er komið áfram í 16-liða úrslit bikarsins, en Forest úr leik. Þetta er annar leikurinn sem Postecoglou stýrir og annað tapið, en hann tók við liðinu af Nuno Espirito Santo eftir að Portúgalinn var látinn fara.