Agla María Albertsdóttir í leiknum gegn Frökkum
Íslenska landsliðskonan Agla María Albertsdóttir fór aðeins yfir Evrópumótið í viðtali við Fótbolta.net eftir að það varð ljóst að Ísland færi ekki áfram í 8-liða úrslitin, en hún segir að heppnin hafi einfaldlega ekki fallið með liðinu á þessu móti.
Lestu um leikinn: Ísland 1 - 1 Frakkland
Agla var í byrjunarliði Íslands gegn Frökkum í kvöld og náði nokkrum sinnum að skapa hættu fyrir framan mark eins sterkasta landsliðs heims.
Ísland þurfti að sætta sig við 1-1 jafntefli, það þriðja í riðlinum, en Belgía vann á meðan Ítalíu og eru það því Belgar sem fara áfram.
Agla segir að liðið hefði mátt nýta færin betur á mótinu og benti á leikina tvo gegn Belgíu og Ítalíu.
„Það er alveg ömurlegt og hvernig maður horfir í hvernig leikirnir hafa spilast hjá okkur hvað við höfum verið nálægt því að stela þessu í lokin í fyrstu tveimur leikjunum. Í raun var þetta leikur þar sem við erum raunverulega heppnar að fá víti þarna í lokin og jafna leikinn, en þetta hefur einhvern veginn verið stöngin út."
„Að sama skapi hafa verið mjög góðir spilkaflar eins og í þessum leikjum, þannig heilt yfir jákvæð frammistaða. Við verðum að hanga á því og reyna að taka það með okkur í næsta verkefni því það er undankeppni HM næst og það þarf að vera klár í það," sagði Agla.
Ísland átti góðan möguleika á að ná í sigur gegn bæði Belgíu og Ítalíu en liðið nýtti ekki færin nægilega vel.
„Það eru tvö móment sem koma upp í hausinn. Það er færið sem við fáum undir lokin gegn Belgíu, sem hefði verið mjög sterkt að klára það þá. Svo fáum við tvö mjög góð færi á móti Ítalíu, kannski Belgía núna þegar maður horfir eftir á. Maður reynir að halda sér ekki þar, en það er mjög súrt."
Stuðningurinn á mótinu hefur verið frábær og hafa stelpurnar reglulega rætt hvað það hefur reynst þeim mikilvægt. Agla þakkaði þeim kærlega fyrir orkuna sem þeir gáfu þeim í leikjunum.
„Sjá þetta vaxa á hverju stórmótinu, þetta er að verða betra og betra. Þetta gefur ógeðslega mikla orku og eins og ég sagði að mig minnir fyrir Ítalíuleikinn að þetta kemur okkur inn í leikina og förum af fullu gasi inn í leikina og það eru allir með okkur í liði og það skiptir ógeðslega miklu máli þannig við erum ótrúlega þakklátar að fólk nenni að koma hingað og fylgjast með okkur."
Markmiðið að skrifa söguna í september
Nú tekur við undankeppni HM í september. Ísland mætir Hvíta-Rússlandi á Laugardalsvelli áður en liðið fer í hreinan úrsitaleik gegn Hollandi ytra um öruggt sæti á HM. Liðið sem hafnar í öðru sæti fer í umspil.
„Jú, við getum heldur betur verið að skrifa söguna með því að komast á HM. Steini sagði eftir leik að það væri fullur fókus á það," sagði Agla í lokin.
Athugasemdir
