Neville sagði Palace hafa verðskuldað sigurinn en tók skýrt fram að Rauðu djöflunum sárvantar miðvörð til að taka stöðu Victor Lindelöf í byrjunarliðinu. Svíinn gerðist sekur um slakan varnarleik nokkrum sinnum í leiknum og refsuðu gestirnir, enda urðu lokatölur 1-3.

„Solskjær verður spurður mikið út í kaupstefnu Man Utd eftir þetta tap - af hverju hafa þeir ekki keypt fleiri leikmenn? Þetta hefur verið umtalað að undanförnu, sérstaklega þar sem öll liðin í kring hafa verið að bæta við sig leikmönnum," sagði Neville.

„Það er hægt að tala endalaust um Jadon Sancho en þetta lið er ekki að fara að vinna deildarkeppnina án þess að kaupa sér nýjan miðvörð. Það vantar miðvörð sem getur hlaupið hratt og er góður maður á mann. Hann verður að vera hreyfanlegur, snöggur og ákveðinn."