Blikastelpur voru búnar að tryggja sér Íslandsmeistaratitilinn en vildu klára tímabilið á sigri.

Leikurinn byrjaði á skiptingu. Katrín Ásbjörnsdóttir var í byrjunarliðinu, en fékk heiðursskiptingu eftir fyrsta spark leiksins þar sem hún er að leggja skóna á hilluna. Katrín varð Íslandsmeistari með þremur liðum; Breiðablik, Stjörnunni og Þór/KA á ferlinum og spilaði 19 A-landsleiki.

Fallegt augnablik en alvaran tók við eftir skiptinguna. Maya Lauren Hansen skoraði stórbrotið mark fyrir FH á 12. mínútu og gersamlega óverjandi. Thelma Lóa Hermannsdóttir átti stoðsendinguna.

Blikar svöruðu aðeins tveimur mínútum síðar er Samantha Smith fékk boltann á fjærstönginni og skoraði.

Staðan í hálfleik 1-1, en þegar tuttugu mínútur voru eftir af leiknum kom Birta Georgsdóttir heimakonum í 2-1. Andrea Rut Bjarnadóttir átti laglega sendingu inn fyrir á Birtu sem vippaði boltanum yfir markvörðinn og í netið.

Andrea Rán Snæfeld Hauksdóttir jafnaði fyrir FH á 81. mínútu með þrumuskoti fyrir utan teig.

Mikil veisla var á Kópavogsvelli enda Blikastelpur að fara fagna Íslandsmeistaratitlinum og var mikilvægt fyrir þær að klára mótið á sigri. Það hafðist. Hornspyrnu var flengt inn á teiginn, boltinn skallaður að marki áður en hann datt fyrir Heiðu Ragneyju Viðarsdóttur sem tryggði dramatískan sigur.

Magnað tímabil hjá Blikum sem klára það með 56 stig, átta stigum á undan FH sem hafnaði í öðru sæti og tekur þar með Evrópusætið fyrir næstu leiktíð.

Flott tímabil hjá Þrótturum

Þróttarar kláruðu tímabilið með 1-0 sigri á Val í Laugardalnum.

Tölfræðilega séð var enn möguleiki fyrir Þrótt að taka annað sætið, en það hefði þurft kraftaverk til þess.

Sierra Marie Lelii skoraði markið sem skilaði sigrinum í dag er hún skoraði eftir slaka hreinsun Valsara eftir aukaspyrnu.

Þróttarar kláruðu tímabilið með 48 stig, sem er nýtt stigamet hjá félaginu í efstu deild. Stórkostlegt tímabil í alla staði og munaði svo ótrúlega litlu á að liðinu tækist að taka annað sætið.

Valskonur höfnuðu á meðan í 5. sæti með 29 stig, slakasti árangur liðsins síðan 2018 er það hafnaði í 4. sæti.

Jafnt á heimavelli hamingjunnar

Víkingur og Stjarnan skildu jöfn, 1-1, á Víkingsvellinum.

Arna Dís Arnþórsdóttir skoraði með flottu skoti fyrir utan teig á 21. mínútu. Stjarnan fór með eins marks forystu inn í hálfleikinn, en á 59. mínútu jafnaði Bergdís Sveinsdóttir metin.

Stjarnan hafnaði í 4. sæti með 32 stig en Víkingur í 5. sæti með 29 stig.

Breiðablik 3 - 2 FH
0-1 Maya Lauren Hansen ('12 )
1-1 Samantha Rose Smith ('14 )
2-1 Birta Georgsdóttir ('70 )
2-2 Andrea Rán Snæfeld Hauksdóttir ('81 )
3-2 Heiða Ragney Viðarsdóttir ('89 )
Lestu um leikinn

Þróttur R. 1 - 0 Valur
1-0 Sierra Marie Lelii ('50 )
Lestu um leikinn

Víkingur R. 1 - 1 Stjarnan
0-1 Arna Dís Arnþórsdóttir ('21 )
1-1 Bergdís Sveinsdóttir ('59 )
Lestu um leikinn