Eftir markalausan fyrri hálfleik tók Haaland málin í sínar hendur og skoraði tvö á fimm mínútum.

Phil Foden sendi Nico O'Reilly í gegn vinstra megin sem kom síðan með frábæra fyrirgjöf á kollinn á Haaland sem stangaði boltann í netið úr miðjum teignum.

Haaland gerði ellefta mark sitt á tímabilinu fimm mínútum síðar. Aftur var það Phil Foden sem tókst í þetta sinn að finna Savinho sem var með gott pláss. Hann kom boltanum út á Haaland sem skaut boltanum meðfram grasinu og framhjá Jordan Pickford í markinu.

Norðmaðurinn í miklu stuði og sá til þess að koma sínum mönnum á toppinn. Man City er með 16 stig, jafnmörg og Arsenal, en betri markatölu.

Crystal Palace og Bournemouth gerðu ótrúlegt 3-3 jafntefli á Selhurst Park.

Hinn 19 ára gamli Eli Junior Kroupi skoraði tvö fyrir Bournemouth í fyrri hálfleiknum.

Frakkinn skoraði sitt fyrsta mark fyrir Bournemouth gegn Leeds í síðasta mánuði og er heldur betur að stimpla sig inn í liðið.

Fyrra markið gerði hann með skalla af stuttu færi eftir hornspyrnu og seinna með föstu skoti eftir að fyrirgjöf Antoine Semenyo fór af varnarmanni og til Kroupi sem skoraði.

Í seinni hálfleiknum svöruðu heimamenn og var það ágætis svar, en Mateta skoraði þá tvö mörk á fimm mínútum. Daniel Munoz lagði snyrtilega upp fyrir Mateta sem gat ekki annað en sett boltann í netið af stuttu færi og seinna markið ekkert ósvipað því sem hann gerði með Frökkum gegn Íslandi á dögunum, nema í þetta sinn fór það í vinstra hornið.

Dramatíkinni var ekki lokið og voru það gestirnir sem komust aftur í forystu. Marcus Tavernier var með boltann vinstra megin í teignum, kom föstum fyrir á Ryan Christie sem þrumaði boltanum í netið.

Í blálokin hélt dramatíkin áfram er Marc Guehi var rifinn niður í teig Bournemouth. Dómarinn dæmdi vítið og var það í kjölfarið staðfest með hjálp VAR.

Mateta á þrennunni, steig á punktinn og skoraði. Önnur þrennan í deildinni fyrir Palace. Hann gat skoraði fjórða markið og tryggt sigurinn undir lokin, en fór illa að ráði sínu úr algeru dauðafæri.

Jafntefli var niðurstaðan á Selhurst Park og bæði lið aðeins tapað einum leik á tímabilinu. Palace er í 8. sæti með 13 stig en Bournemouth í 4. sæti með 15 stig.

Brighton lagði Newcastle að velli, 2-1, á AMEX-leikvanginum í dag.

Danny Welbeck skoraði fyrra mark Brighton á 41. mínútu er hann var sendur í gegn. Hann lyfti boltanum létt yfir Nick Pope í markinu og skoraði sitt þriðja mark á tímabilinu.

Nick Woltemade skoraði fjórða leikinn í röð með Newcastle með stórkostlegu marki á 76. mínútu. Lewis Miley kom boltanum inn á miðjan teiginn á Woltemade sem sneri baki í markið, en ákvað að bjóða upp á lauflétta hælspyrnu sem hann stýrði neðst í vinstra hornið. Stórbrotið mark, en því miður skilaði það litlu fyrir Newcastle.

Á 84. mínútu skoraði Welbeck sigurmarkið eftir frábæra sókn Brighton-manna. Mats Wieffer fékk sendingu í gegn og reyndi skotið, en boltinn af varnarmanni og til Welbeck sem stóð við vítateigslínuna og afgreiddi boltann snyrtilega í fjærhornið.

Brighton í 9. sæti með 12 stig en Newcastle í 12. sæti með 9 stig.

Sunderland bar sigur úr býtum gegn Wolves, 2-0, á leikvangi ljóssins.

Nordi Mukiele skoraði fyrra markið á 16. mínútu eftir skemmtilega sókn heimamanna. Trai Hume fann Mukiele sem slapp á bak við vörn Úlfana og setti boltann undir Sam Johnstone í markinu.

Á lokamínútum leiksins bættu Sunderland-menn við öðru með ágætis hjálp frá Úlfunum. Heimamenn keyrðu fram í skyndisókn, boltinn kom frá Chemsdine Talbi og á Ladislav Krejci sem sparkaði honum klaufalega í eigið net.

Sunderland fer upp í 7. sætið með 14 stig. Ágætis byrjun hjá nýliðunum en Úlfarnir á botninum með aðeins 2 stig.

Burnley vann Leeds 2-0 á Turf Moor. Lesley Ugochukwu skoraði með skalla eftir geggjað fyrirgjöf frá Kyle Walker á 18. mínútu og skoraði Loum Tchaouna fallegt mark á 68. mínútu með skoti fyrir utan teig og yfir Karl Darlow í markinu.

Leeds í 15. sæti með 8 stig en Burnley í 17. sæti með 17 stig.

Úrslit og markaskorarar:

Crystal Palace 3 - 3 Bournemouth
0-1 Eli Junior Kroupi ('7 )
0-2 Eli Junior Kroupi ('38 )
1-2 Jean-Philippe Mateta ('64 )
2-2 Jean-Philippe Mateta ('69 )
2-3 Ryan Christie ('89 )
3-3 Jean-Philippe Mateta ('90 , víti)

Sunderland 2 - 0 Wolves
1-0 Nordi Mukiele ('16 )
2-0 Ladislav Krejci ('90 , sjálfsmark)

Manchester City 2 - 0 Everton
1-0 Erling Haaland ('58 )
2-0 Erling Haaland ('63 )

Brighton 2 - 1 Newcastle
1-0 Danny Welbeck ('41 )
1-1 Nick Woltemade ('76 )
2-1 Danny Welbeck ('84 )

Burnley 2 - 0 Leeds
1-0 Lesley Ugochukwu ('18 )
2-0 Loum Tchaouna ('68 )