„Ég upplifði þetta þannig að við vorum alveg með þá undir control í fyrri hálfleik. Mér fannst varnarleikurinn okkar ganga 100% upp, fengum tvö ákjósanleg færi í fyrri hálfleik og fórum sáttir inn í hálfleikinn," sagði Davíð Þór Viðarsson, aðstoðarþjálfari FH, eftir tap gegn Rosenborg í kvöld.
Lestu um leikinn: FH 0 - 2 Rosenborg
„Við byrjum seinni hálfleikinn mjög vel en svo, eins og verður oft þegar fer mikil orka í varnarleikinn, missa menn einbeitinguna í skamma stund og lið eins og Rosenborg refsa okkur tvisvar fyrir það."
Það var ekki mikill munur á færafjölda liðanna í kvöld. Kom gæðamunurinn í ljós í þessum færum?
„Það er oft talað um muninn á atvinnumannaliði og hálf atvinnumannaliði. Það kom kannski aðeins í ljós þarna. Tilfinningin sem situr eftir er svekkelsi að hafa tapað þessum leik. Mér fannst það óþarfi en það situr líka eftir ánægja með spilamennskuna að miklu leyti. Menn lögðu alveg ótrúlega mikið í þetta og voru tilbúnir að fórna sér fyrir hvern annan í 90 mínútur. Maður getur alls ekki kvartað yfir því," sagði Davíð.
Hann kom inn á seinni leikinn í Þrándheimi, innkomu varamanna, framfarir í spilamennsku og svaraði spurningum um leikmannaslúður í seinni hluta viðtalsins.
Viðtalið í heild má sjá í spilaranum hér að ofan.
