Landsliðsfyrirliðinn snéri aftur í liðið eftir rúmlega eins árs fjarveru og var í byrjunarliðinu sem var tilkynnt fyrir leikinn.

Fyrirliðabandið fór beint á handlegg hans og skilaði hann sínu verki vel í annars lokuðum leik í Austurríki.

„Virkilega góð. Ánægður með spilamennskuna, fannst við vera nokkuð solid í dag. Gerðum hluti sem við lögðum upp með og getum tekið margt jákvætt úr þessum leik. Fengum ekki mörg færi á okkur, lokuðum vel á þá og þeir voru flinkir með boltann og vissum að þeir myndu reyna að þræða boltann í gegnum okkur. Við komum bara vel undirbúnir í þennan leik og ánægður að ná í sigur þó þetta sé æfingaleikur. Það er gott að fá tilfinninguna að sigra leiki og það er mjög mikilvægt fyrir þennan hóp að ná í sigur og hugsa um framhaldið sem er Albanía og vonandi verður það úrslitaleikur," sagði Aron Einar við Fótbolta.net.

Aron var í miðvarðarstöðunni með Herði Björgvini Magnússyni en þeir spiluðu óaðfinnanlega. Aron hefur ekki verið að spila þessa stöðu með landsliðinu en þekkir hana þó vel í Katar.

„Ég er alveg nokkuð vanur þessu. Ég er búinn að spila síðasta árið í Katar í miðvarðarstöðu. Búinn að fylla inn í þar útaf meiðslum og öðru. Líður mjög vel þar og þetta er svipað í miðverði og í sexunni, kannski aðeins öðruvísi hliðarhreyfingar sem ég er að venjast og á eftir að læra ýmislegt þar ef að ég í framhaldinu tek að mér þessa stöðu en fyrst og fremst ánægður að vera kominn til baka og getað hjálpað liðinu áfram og gefa af mér þá reynslu sem ég hef. Virkilega ánægður að vera kominn til baka og fá þá tilfinningu aftur."

Hann var ánægður með ungviðinn í hópnum og vill hann nú miðla reynslu sinni til leikmanna eins og eldri leikmenn gerðu þegar hann var að stíga sín fyrstu skref.

„Ég var í sama pakka á sínum tíma þegar ég kom inn í þetta fyrst og hafði gæja sem ég var að læra af eins og Eiður, Hemmi, Heiðar og Brynjar Björn. Það var mikilvægt fyrir mig þegar ég var að koma inn í þetta og vonandi er ég að skila því verkefni af mér til þessa hóps. Þetta eru ungir strákar sem eru að læra og það tekur tíma eins og hefur margoft komið fram. Þeir eru viljugir og hlusta og eru vinnusamir. Það sést greinilega og eins og sást í dag, það var gífurleg vinnusemi og ánægður hvernig leikurinn spilaðist."

Næst á dagskrá er leikur gegn Albaníu á þriðjudag en sigur gæti komið Íslandi í A-deildina.

„Við getum tekið margt jákvætt úr þessum leik þó það hafi ekki verið skemmtilegt að horfa á hann. Við vissum að við þyrftum að ná að halda þeim niðri og gerðum það vel. Heppnin var með okkur að fá víti og klárum þennan leik. Sigur er jákvæður fyrir þennan hóp og taka það inn í Albaníuleikinn og það verður vonandi úrslitaleikur og mikið undir og það verður enn skemmtilegra," sagði hann í lokin.

Tweet

Senda a Facebook Hafdu samband Senda frétt Prenta frétt Frétta leit