Darren Moore hefur verið ráðinn nýr stjóri Huddersfield en hann tekur við starfinu af Neil Warnock.
Warnock stýrði sínum síðasta leik með Huddersfield síðasta miðvikudag er liðið gerði 2-2 jafntefli við Stoke á heimavelli.
Warnock var hættur að vinna þegar hann samþykkti að taka við Huddesfield í febrúar og stýra liðinu út þáverandi tímabil. Liðið var í 23. sæti þegar hann tók við en vann sjö af fimmtán leikjum undir hans stjórn og endaði í 18. sæti, níu stigum fyrir ofan fallsæti.
Hinn 74 ára gamli Warnock ákvað að halda áfram með liðið í sumar en félagið hefur núna tekið ákvörðun um að ráða stjóra til lengri tíma.
Moore, sem er 49 ára gamall, tekur núna við starfinu en félagið segist hafa farið í mikla greiningarvinnu til að finna rétta stjórann. Moore stýrði síðast Sheffield Wednesday en hann komst ekki að samkomulagi við félagið um áframhaldandi samning eftir að hafa stýrt liðinu upp í Championship-deildina, næst efstu deild Englands.
Hann hefur einnig stýrt West Brom og Doncaster á sínum stjóraferli.
Athugasemdir