„Þetta var jafn leikur. Baráttuleikur og stöðubarátta allan tímann. Rosalega lítið um færi“, sagði Þorsteinn Halldórsson þjálfari Breiðabliks eftir 1-1 jafntefli liðsins við Þór/KA.
Lestu um leikinn: Breiðablik 1 - 1 Þór/KA
„Auðvitað viljum við alltaf vinna þannig að við erum ekki sátt við þetta en þetta er bara niðurstaðan og við verðum bara að taka þetta stig og halda áfram.“
Leikurinn var lokaður og lítið um færi en Þorsteinn átti ekki skýringar á því af hverju Blikum hefði ekki tekist að skapa sér fleiri marktækifæri.
„Ég veit það ekki. Ég er ekki búinn að skoða leikinn. Ég þarf að horfa á hann aftur og meta það en það gekk illa að láta boltann ganga. Í fyrri hálfleik fengum við reyndar fínar opnanir en mér fannst við oft geta gert betur í stöðunni. Við fengum fínar stöður og vorum klaufar í hröðu upphlaupunum og síðustu sendingunni. Við náðum að opna þær í nokkur skipti í fyrri hálfleik en sjaldan í seinni hálfleik og í raun og veru aldrei.“
„Mér þætti reyndar gaman að sjá þessa rangstöðu sem var dæmd á Fanndísi,“ bætti Þorsteinn við. „Það væri áhugavert að sjá það. Ég get reyndar ekki metið það. Ég var ekki í nógu góðri stöðu til að sjá það en fólkinu í stúkunni fannst hún vera réttstæð. Það verður áhugavert að sjá það. Þar er komið dauðafæri.“
Ríkjandi Íslandsmeistararnir hafa farið rólega af stað í stigasöfnun þetta sumarið og gert jafntefli í tveimur síðustu leikjum eftir sigur í fyrstu umferð. Þorsteinn segist ekki sáttur við uppskeruna en ætlar ekki að staldra við svekkelsið heldur horfa fram á veginn.
„Auðvitað erum við ekkert sátt við jafntefli í síðustu tveimur leikjum. Langt því frá. En við getum ekki breytt því í dag og það er bara næsti leikur. Það er það eina sem við getum verið að horfa á.“
