England: Newcastle skoraði átta í Sheffield

Sheffield United og Newcastle áttust við í síðasta leik dagsins í ensku úrvalsdeildinni og tóku gestirnir frá Newcastle forystuna á 21. mínútu þegar Sean Longstaff setti boltann í netið eftir undirbúning frá Anthony Gordon.

Varnarmennirnir Dan Burn og Sven Botman bættu svo tveimur mörkum við fyrir leikhlé. Bæði voru skoruð með skalla eftir fast leikatriði frá Kieran Trippier.

Staðan var 0-3 í leikhlé og skiptu gestirnir um gír í seinni hálfleik þar sem Callum Wilson skoraði á 56. mínútu, áður en Gordon bætti fimmta markinu við og Miguel Almiron svo því sjötta. 

Leikmenn Newcastle skiptu mörkunum bróðurlega á milli sín þar sem Bruno Guimaraes og Alexander Isak áttu báðir eftir að skora, en lokatölur urðu 0-8. Newcastle jafnar þar með sitt eigið félagsmet yfir stærsta sigurinn í ensku úrvalsdeildinni eftir 8-0 sigur gegn Sheffield Wednesday í september 1999.

Newcastle er með níu stig eftir sex umferðir þökk sé stórsigrinum í dag en Sheffield situr eftir á botninum með eitt stig.