Mark dæmt af Jóhanni Berg
Jóhannes Kristinn Bjarnason kom við sögu í sigri Kolding gegn Middelfart í næstefstu deild danska boltans í dag.
Kolding vann 1-0 og er í efri hluta deildarinnar, með 21 stig eftir 14 umferðir. Liðið er aðeins þremur stigum frá toppsætinu sem stendur.
Guðlaugur Victor Pálsson lék allan leikinn í tapi Horsens gegn B.93. Horsens er í fjórða sæti, einu stigi fyrir ofan Kolding.
Í næstefstu deild í Hollandi kom Helgi Fróði Ingason inn af bekknum í tapi Helmond á heimavelli gegn Dordrecht. Helga var skipt inn þegar Helmond leiddi 1-0 og á nokkrum mínútum sneru gestirnir stöðunni sér í hag, svo lokatölur urðu 1-2.
Helmond er með 16 stig eftir tapið, þremur sitgum á eftir Dordrecht sem situr í umspilssæti um sæti í efstu deild.
Elías Már Ómarsson lék þá allan leikinn í fremstu víglínu í tapi Meizhou Hakka í kínversku deildinni, en liðið er tveimur stigum fyrir ofan fallsvæðið á lokametrunum.
Í Sameinuðu arabísku furstadæmunum duttu Jóhann Berg Guðmundsson og Milos Milojevic úr leik í bikarnum á sama tíma. Jói Berg setti boltann í netið en ekki dæmt mark vegna rangstöðu eftir athugun í VAR.
Hann lék fyrstu 74 mínúturnar og urðu lokatölur 1-1 en liðsfélagar Jóa Bergs í liði Al-Dhafra töpuðu leiknum í framlengingu.
Lærlingar Milos fóru þá alla leið í vítakeppni þrátt fyrir að vera sterkari aðilinn í venjulegum leiktíma og framlengingu. Allir leikmenn skoruðu úr sínum spyrnum nema síðasti spyrnumaðurinn í Al-Sharjah, liði Milos.
Brynjar Ingi Bjarnason var að lokum ekki með vegna meiðsla er Greuther Fürth steinlá í næstefstu deild í Þýskalandi. Brynjar og félagar eru með 10 stig eftir 10 umferðir.
Kolding 1 - 0 Middelfart
B.93 1 - 0 Horsens
Helmond 1 - 2 Dordrecht
Meizhou Hakka 1 - 4 Yunnan Yukun
Al-Sharjah 1 - 1 United FC
4-5 í vítaspyrnukeppni
Al-Wahda 3 - 1 Al-Dhafra
Greuther Furth 1 - 4 Karlsruher
Athugasemdir
