Fallbaráttulið SPAL byrjar daginn á heimavelli gegn Bologna. Heimamenn eru aðeins búnir að vinna fjóra leiki í deildinni en tveir sigranna komu í síðustu fjórum umferðum. Bologna er níu stigum ofar, um miðja deild, en hefur ekki enn tekist að vinna fótboltaleik á nýju ári.

Fiorentina, sem tekur á móti Genoa í öðrum leik dagsins, gæti verið að taka við sér eftir herfilega byrjun á tímabilinu. Liðið lagði Napoli á útivelli og er komið níu stigum frá fallsvæðinu. Genoa situr á botninum með 14 stig eftir 20 umferðir.

Lokaleikur dagsins er ekki af verri endanum og verður sýndur beint á Stöð 2 Sport 2. Torino tekur þar á móti Atalanta í Evrópubaráttunni.

Torino tapaði fyrir Sassuolo í síðustu umferð og er þremur stigum frá Evrópusæti. Atalanta tapaði óvænt á heimavelli gegn SPAL og situr í fimmta sæti, þremur stigum frá Meistaradeildarsæti.

Leikir dagsins:
14:00 SPAL - Bologna
17:00 Fiorentina - Genoa
19:45 Torino - Atalanta (Stöð 2 Sport 2)