Útlitið var ekki gott hjá Genoa eftir 47 mínútna leik. Skotinn Lewis Ferguson skoraði á 35. mínútu og gerði Sebastian Otoa sjálfsmark snemma í þeim síðari.

Það fór þó að birta til hjá heimamönnum. Lukasz Skorupski, markvörður Bologna, sá rauða spjaldið á 57. mínútu er hann hljóp langt út úr markinu, missti stjórn á boltanum og fór í ljóta tæklingu.

Genoa nýtti sér liðsmuninn. Úkraínumaðurinn Ruslan Malinovskyi minnkaði muninn á 62. mínútu með þrumufleyg úr aukaspyrnu áður en Caleb Ekuban jafnaði metin sextán mínútum síðar.

Í byrjun uppbótartímans kom síðan sigurmark Genoa sem Brasilíumaðurinn Junior Messias gerði eftir aðra stoðsendingu Alessandro Marcandalli í leiknum.

Mikael Egill lék allan leikinn hjá Genoa sem er í 13. sæti með 23 stig en Bologna í 8. sæti með 30 stig.

Atalanta valtaði yfir Parma, 4-0. Gianluca Scamacca skoraði úr víti á 15. mínútu og bætti Hollendingurinn Marten de Roon við öðru níu mínútum síðar.

Giacomo Raspadori og Nikola Krstovic gerðu síðan tvö mörk á síðustu tuttugu mínútunum til að gulltryggja sigurinn. Atalanta er í 7. sæti með 35 stig en Parma í 15. sæti með 23 stig.

Genoa 3 - 2 Bologna
0-1 Lewis Ferguson ('35 )
0-2 Sebastian Otoa ('47 , sjálfsmark)
1-2 Ruslan Malinovskyi ('62 )
2-2 Caleb Ekuban ('78 )
3-2 Junior Messias ('90 )
Rautt spjald: Lukasz Skorupski, Bologna ('57)

Atalanta 4 - 0 Parma
1-0 Gianluca Scamacca ('15 , víti)
2-0 Marten de Roon ('24 )
3-0 Giacomo Raspadori ('73 )
4-0 Nikola Krstovic ('90 )

Sassuolo 1 - 0 Cremonese
1-0 Alieu Fadera ('3 )

Smelltu hér til að kaupa áskrift að Livey